3-августдиз Самурдин тамун мулкара мергьяматлувилин «ЛЕКИ» фондуни ва Мегьарамдхуьруьн райондин администрацияди тешкилай чIехи субботник кьиле фена.
Гьар йисуз тухун адетдиз элкъвенвай экологиядин и мярекатда Ахцегь, Докъузпара, Кьурагь, СтIал Сулейманан, Хив, Мегьарамдхуьруьн районрай, Краснодар, Москва, Ярославль, Ростов-на-Дону, Мурманск, Калуга, Вологда, Ухта, Махачкъала, Дербент, Каспийск шегьеррай 200-далай виниз ватанэгьлийри иштиракна.
«ЛЕКИ» фондунин пресс-къуллугъди хабар гузвайвал, субботникдин сергьятра аваз, санлай къачурла, 500-дав агакьна шешелра авай кьван зирзибил кIватIна. Къейд ийин хьи, субботникда иштиракай Билбилхуьруьн-Къазмайрин мектебда кIелзавай аялрини михьивилер авуник чпин пай кутуна. Фондунин активистри винидихъ тIвар кьур хуьруьн агьалийрихъ галаз санал Самурдин тамун мулкара иниз ял ягъиз къвезвайбуруз михьивал хуьниз эвер гузвай кхьинар алай баннерарни алкIурна…
Чи мухбир
