4-августдиз Рутул райондин ЦIийи Борч хуьре Тула шегьерда регистрация авунвай жемиятдин «Кавказдинни Албаниядин халкьарин конгресс» тешкилатдин къаюмвилик кваз «Кавказдинни Албаниядин халкьар: тарих ва алай аям» илимдинни тежрибадин кьвед лагьай конференция кьиле фена.
Докладрин тематикадик тарихдин, лингвистикадин, адетрин, алай аямдин шартIара жегьилрин арада тербиядин кIвалах тухунин месэлаяр квай. Конференцияда уьлкведин жуьреба-жуьре пипIера яшамиш жезвай диаспорайрин векилри иштиракна. Конференция винидихъ тIвар кьур тешкилатдин сопредседатель Шакир Давудова ачухна.
Конгрессдин кIвалахдин ва вилик акъвазнавай месэлайрин гьакъиндай тешкилатдин председатель Ризван Максимова ва педагогикадин илимрин кандидат, МосГУ-дин высший математикадин кафедрадин доцент, тешкилатдин председателдин заместитель Шамил Халилова Урартудин ва Кавказдин Албаниядин графикадин ва абур алай аямдин лезги чIалариз мукьва хьунин гьакъиндай авур докладри мярекатдин иштиракчийрин патай кьетIен итиж арадал гъана.
ДГУ-дин профессор, РД-дин Халкьдин Собранидин депутат Узлипат Гьасановади вичин доклад хайи чIалар хуьнин важиблувилин ва хайи чIаларин пешекарар, кIелдай ва методикадин литература гьазурунин месэлайриз талукьарнавай.
Конференциядал жуьреба-жуьре темайрай докладар гваз Вагьаб Къазибегов (Махачкъала), Камал Рустамов (юридический илимрин кандидат, Саратов шегьер), Рамазан Къулиев (Дербент), Минетуллагь Алдеров (Москва), Исакь Гьажиев (Санкт-Петербург), Нуьсрет Максимов (Ростов-на-Дону), Ариф Гъафизов (Докъузпара район) ва масабур рахана.
Теологиядин илимрин доктор Мурад Садикьова кIватI хьанвайбур куьгьне Борч хуьряй жагъанвай къванерал алай араб кхьинрин таржумайрихъ галаз танишарна. РД-дин Общественный палатадин образованидин, илимдин ва культура вилик тухунин месэлайрай комиссиядин член Алисултан Алисултанован докладда рутул чIал авай гьалдиз ва ам вилик тухуниз талукь месэлаяр веревирдна. Шакир Давудова теклифнавай архивдин материалрин бинедаллаз, Борч хуьруьн агьалийрин ата-бубайрилай эгечIна, генеалогия жагъурунин электронный программа туькIуьрунин тежрибади конференциядин иштиракчийрин дикъет вичел желбна.
Акьалтзавай несилриз ватанпересвилин тербия гунин карда ихьтин мярекатрихъ еке метлеб ава ва иштиракчийри гележегда абур мадни гегьенш сергьятра аваз кьиле тухун менфятлу тирди къейдна.
Конференция куьтягь хьайидалай кьулухъ тешкилатчийри вири иштиракчийриз «Кавказдинни Албаниядин халкьарин конгресс» тешкилатдин лишанар алай дипломар, футболкаяр, календарар ва блокнотар пайна ва нисинин фу тIуьна.
Халил Шамилов
