2024-йисан сад лагьай паюна Дагъустанда ишлемишиз вахкузвай яшайишдин кIвалерин кьадар, алатай йисан гьа и вахтунив гекъигайла, вад сеферда гзаф хьанва, хабар гузва РД-дин эцигунрин ва архитектурадин министерстводи. Алай йисан январдилай июндалди республикада, малум хьайивал, 2 миллионни 93,2 агъзур кв. метр яшайишдин кIвалер вахканва. 2023-йисан январь-июнь варцарин кьадардив гекъигайла, им 499,2 процент тешкилзавай делил я.
Къейдзавайвал, кьилдин ксарин яшайишдин кIвалер (ИЖС) эцигун важиблу делил хьана — и хиле 1 миллионни 872 агъзур кв.метр ишлемишиз вахканва. Гзаф квартирайрикай ибарат кIвалерин (МКД) кьадарни алатай йисандалай гзаф я. ИкI, ишлемишиз вахканвай 221,2 агъзур кв.метр кIвалери, 2023-йисан и вахтунин кьадардив гекъигайла, 108,1 процент тешкилзава.
Идалайни гъейри, кIвалер эцигзавайбурун Сад тир ресурсдин делилралди, Дагъустан Россиядин виридалайни гзаф майдандин квартираяр эцигзавай регионрикай сад хьанва. Республикада эцигзавай квартирадин майдан юкьван гьисабдалди 62,1 кв.метрдиз барабар я. И жигьетдай виридалайни вилик квай 5 региондин сиягьда гьакIни ава: Ингушетия — 83,4 кв.м, Чечня — 74,6 кв.м., Кабардино-Балкария — 65,5 кв.м., Кеферпатан Осетия-Алания — 62,9 кв.м. Россиядин мулкунал эцигзавай квартирайрин юкьван майдан 49,1 кв.метрдиз барабар я.
Чи мухбир
