Амина Муслимова
30-июлдиз Кьурагь райондин Кумухрин хуьре, «Россиядин къуват» марафондин сергьятра аваз, итимрин ва аялрин арада тIамайрай турнир кьиле фена, хабар гузва муниципалитетдин информациядин центради. Турнирда Кьиблепатан Дагъустандин гьар жуьре районрай тир тахминан 30 касди иштиракна. Мярекат, хабар гузвайвал, Кумухрин хуьруьн администрацияди, спортдал ва сагълам уьмуьр тухунал рикI алай Исмаил Абдуллаева ва са шумуд хуьруьнвиди санал тешкилнавай.
Турнирдин иштиракчийри кIвенкIвечивал патал 5 сятда акъажунарна. Нетижада итимрин арада сад лагьай чка Исрефил Шихкеримова (КIирийрин хуьр) къазанмишна, 2 лагьай чка Кумухай тир Исмаил Абдуллаева кьуна. Пуд лагьай чкадиз Белиж поселокдай тир Мевлуьд Адамов лайихлу хьана.
Аялрин арада: 1 лагьайди — Мугьаммад Гьасанбегов, 2 лагьайди — Альфия Ражабова ва 3 лагьай чка — Къазимегьамед Гьажимурадов. Пудни Табасаран райондай я.
Гъалиб хьайи ва пишкешдин чкаяр кьур вирибуруз медалар, грамотаяр, пулдин шабагьар гана. Идалайни гъейри, шабагьралди турнирдин судьяйрин зегьметни къейдна.
Турнирдин иштиракчийриз ва мугьманриз мярекатдин тешкилатчийри чай ва дадлу кабабар гьазурнавай. Кьурагь райондин администрациядин физкультурадин, спортдин ва жегьилрин крарай начальник Рамиз Рамазанова хуьруьн администрациядиз ва турнир кьиле тухунин карда куьмек гайи вирибуруз сагърай лагьана.
РикIел хкин, Вирироссиядин спортдин «Россиядин къуват» гатун марафон уьлкведин мулкунал 1-июндилай 10-августдалди кьиле физва. Адан бинеда машгьур спортсменрихъ галаз санал спортдин жуьреба-жуьре мярекатар, вердишвилер, зарядкаяр ва мастер-классар кьиле тухун ава. Марафондин сайтда 1100-далай гзаф майданри кIвалахзава. Спортдин мярекатра иштиракун патал «Россиядин къуват» проектдин сайтда регистрация авуртIа жеда.
