Рекъемар раижна
Махачкъаладин гьуьлуьн алишверишдин портуни 2024-йисан сифтегьан ругуд вацра пар ичIирунин кьадар, алатай йисан и муддатдив гекъигайла, 4,3 процентдин тIимиларнава. Идакай «Дагъустан» РИА-ди хабар гузва.
Чешмедин кхьизвайвал, «Морцентр-ТЭК» тешкилатдин малуматра гъизвай делилралди, алай йисан январь-июнь варцара портуни пар ичIирунин умуми кьадар, санлай къачурла, 1 миллионни 611 агъзур тонндиз барабар хьанва. Хабар гузвайвал, алатай 2023-йисан сад лагьай зур йисуз и рекъем 1 миллионни 684 агъзур тонндикай иабарат тир.
Къейдерай малум жезвайвал, кьилди къачуртIа, «цадай» парарин кьадар (наливные грузы) 73 агъзур тонндин кьван тIимил хьанва. Амма портуна ичIирнавай (перевалка) «кьуру» парарин (сухие грузы) кьадар лагьайтIа, виниз акъатнава. Хабар гузвайвал, 2024-йисан сад лагьай паюна 593,5 агъзур тонн кьуру парар ичIирнава. И рекъем 2023-йисан сифтегьан ругуд вацран нетижайриз (593,3 агъзур тонн) саки барабар я.
ГьакIни кхьизвайвал, кьилди къачуртIа, 2024-йисуз санай-масаниз тухузвай цементдин кьадарни 61,5 процентдин артух хьанва ва и рекъем 249,7 агъзур тонндив агакьнава.
Зур йисан нетижаяр
Дагъустанда 2024-йисан сифтегьан ругуд вацра «Хатасуз ерилу рекьер» милли проект кьилиз акъудунин нетижаяр кьуна. Идакай РД-дин транспортдин ва рекьерин майишатдин министерстводин телеграм-каналди хабар гузва.
Къейдзавайвал, винидихъ тIвар кьунвай милли проектдин сергьятра аваз, 270,8 агъзур кв. метр автомобилрин рекьерин винел пад къиредикайни бетондикай ибарат тир къаришмадалди кIевунин серенжемар кьиле тухунин кIвалах акьалтIарнава.
Мадни башкъа, алай вахтунда Махачкъаладин агломерацияда 52,3 миллион манатдин къиметдин улакьрин интеллектуальный къурулуш (ИТС, интеллектуальная транспортная система) кардик кутуниз талукь серенжемарни куьтягьнава. ГьакIни региондин дережадин метлеб авай автомобилрин рекьера 2 АПВГК (автоматический пункт весогабаритного контроля) эцигнава.
Хабар гузвайвал, «Хатасуз ерилу рекьер» милли проектдин сергьятра аваз, алай йисан сифтегьан ругуд вацра Дагъустандин автомобилрин рекьерин 17,6 километр мензилда кIвалахар кьилиз акъудна акьалтIарнава.
РД-дин транспортдин ва рекьерин майишатдин министерстводин телеграм-каналди гъизвай делилрай малум жезвайвал, винидихъ къалурнавай серенжемрилай гъейри, ихтилат физвай милли проектдин сергьятра аваз, Дагъустандин муниципалитетра авай рекьерин са жерге участокрани кIвалахар тамамарнава.
Харжияр авурдалай кьулухъ…
Чпин игьтияжриз талукь вири харжияр авурдалай кьулухъ дагъустанвийрихъ юкьван гьисабдалди вацра 3 агъзур манат пул амукьзава. Идакай «Дагъустандин экономика» телеграм-каналди хабар гузва.
Чешмеди кхьизвайвал, Кеферпатан Кавказстатди СКФО-дин республикайрин агьалийри вацра юкьван гьисабдалди къазанмишзавай къазанжийрин кьадарар ва абуру чпин игьтияжриз ийизвай харжияр гьисабдиз къачунва. Малум хьайивал, са бязи регионра гьар са касди вацра ийизвай харжийрин кьадар абурун вацран къазанжийрин кьадардилай артух я.
Мисал яз, Ставрополдин крайда юкьван гьисабдалди агьалийри къачузвай къазанжидин кьадар 31,4 агъзур яз, абурун игьтияжриз вацра 33,2 агъзур манатдив агакьна пул серф жезва.
Хабар гузвайвал, и региондив гекъигайла, Дагъустанда гьалар са кьадар хъсан я. Чешмедин делилралди, республикада агьалийрин къазанжийрин кьадар юкьван гьисабдалди 32,3 агъзур манатдикай ибарат я, ийизвай харжийрин кьадар лагьайтIа, 29,4 агъзур манат яз къалурнава.
ИкI, чпин игьтияжриз талукь вири харжияр авурдалай кьулухъ дагъустанвийрихъ, винидихъ къейднавайвал, юкьван гьисабдалди 3 агъзур манат пул амукьзава.
Гьазурайди — Муса Агьмедов
