Чи  мухбир

Ислен юкъуз Дагъустандиз Белоруссиядин диндин ва миллет­рин крарин рекьяй тамам ихти­я­рар ганвай Векил Александр Румак мугьман хьанвай. Дагъус­тандин милли сиясатдин ва дин­рин крарин рекьяй минис­тер­ст­вода кьиле фейи гуьруьшдал­ РД-дин Гьукуматдин Председатель Абдулмуслим Абдулмусли­мовани Александр Румака рес­публикайрин арада яшайишдин жуьреба-жуьре хилерай авай ама­дагвилин алакъаяр мягь­ке­ма­рунин месэлаяр веревирдна.

РикIел хкин, шаз Дагъустандин премьер-минис­тр­ди, Расул Гьамзатован 100 йисан юбилейдиз талукьарна, Минскда кьиле фейи мярекатра иштиракзавай чIавуз ада А. Румаказ Дагъларин уьлкведиз атун теклифнай.

Эгер шаз Белоруссияда Да­гъустандин халкьдин шаир Расул Гьамзатован юбилей къейднатIа, цIи къунши уьлкведа «XX асирдин­ Гомер» СтIал Сулейман­ дидедиз хьайидалай инихъ 155 йис тамам­ хьун къейдда. И месэладин гьа­къиндай гуьруьш кьиле физвай чIа­вуз А. Абдулмуслимовни А. Румак меслят хьана.

Къейд ийин хьи, СтIал Сулейманан юбилейдиз талукьарнавай мярекатар йисан эхирдалди давам жеда. Редакциядихъ авай малуматралди, Дагъустандин халкьдин шаирдин юбилей, хайи рес­публикадилайни уьлкведин жуь­реба-жуьре регионрилай гъейри, къецепатан са шумуд уьлкведани къейддайвал я. Абурун арада Азербайжан, Къиргъизия, Беларусь, Туьркия ава.