Агьмед Магьмудов
Алатай гьафтедин эхирра Дагъустандиз РФ-дин энергетикадин министр Сергей Цивилев ва РФ-дин оборонадин министрдин заместитель Анна Цивилева мугьман хьанвай.
Сергей Цивилева Махачкъалада Дагъустандин энергетикадин къурулуш вилик тухунин месэлайриз талукьарнавай совещание кьиле тухвана. Сергей Меликова вичин рахунра алай вахтунда республикадин энергетикадин къурулушда авай гьаларикай хабар гана. «Чна датIана Россиядин энергетикадин министерстводин патай куьмек гьиссзава. Алатай йисалай республикада энергетикадин хилез талукь Оперативный штабди кIвалахзава. Зи фикирдалди, чаз арадал атанвай гьалар хъсан патахъ дегишардай са шумуд рехъ, цIийи къайдаяр жагъанва», — къейдна С. Меликова.
Федеральный дережадин министрди вич Дагъустандиз мугьман хьунин макьсаддикай лагьана — РФ-дин Гьукуматдин Председателди республикадин энергетикадин хилез талукь яз гатIунай кIвалах давамарун ва арадал атанвай гьалариз, мукьувай таниш хьана, къимет гун.
«Сергей Алимовичахъ галаз чун мукьвара Москвада гуьруьшмиш хьанай, асул месэлаярни веревирднай. Амма заз авай гьалариз, чкадал атана, килигиз кIан хьана ва чна санал энергетикадин хилевай месэлаяр гьялдай рекьер тайинарда.
Заз малум тирвал, советрин девирда республикада энергиядалди таъминарунин къурулуш хъсанбурукай сад яз гьисабзавай. Эгер чи чIехи бубайривай Советрин Союзда ам хъсанариз хьанатIа, и кар чавайни жеда. Макьсаддив агакьун патал чахъ къуватарни ава, мумкинвилерни», — лагьана С.Цивилева.
Гуьгъуьнлай Сергей Меликова РФ-дин оборонадин министрдин заместитель Анна Цивилевадихъ галаз кьиле фейи гуьруьшдал Дагъустанда Украинада кьиле физвай дяведин махсус серенжемдин иштиракчийриз, абурун хизанриз яшайишдин рекьяй куьмекар гун патал кьабулзавай серенжемар веревирдна. И юкъуз абуру «Защитники Отечества» фондуна СВО-дин ветеранрихъ ва алай вахтунда ана иштиракзавайбурун мукьвабурухъ галаз гуьруьш кьиле тухвана. Гегьеншдиз РД-дин Кьилин сайтдай кIелиз жеда.
