Чи  мухбир

Мукьвара Алматы шегьерда (Къазахстан) ММА-дай “Hardcore FC” лишандик кваз турнир кьиле фена. Адан сергьятра аваз тешкилнавай кьилин бягьсерикай сана чи ватанэгьли Тагьир Хибиева иштиракна.

Лагьана кIанда, и бягьс спортдин “Hardcore FC” тешкилатдин лигада кар алайбурукай сад яз гьисабзавай. Ана гъалиб хьайидаз “Hardcore FC”-дин цIийи чемпиондин дережа гузвай.

Чемпиондин чIул къачун патал гьасиррал Т.Хибиев Тажикистандай тир Фазлиддин Мадрагьимовахъ галаз гуьруьш­миш хьана. Бягьс 5 раундда давам хьана ва судьяйрин къарардалди чи ватанэгьли гъалиб хьана.

Къейд ийин хьи, Тагьир Хибиеван бинеяр Кьурагь райондай я. Ада Дмит­ров шегьерда кардик квай спортдин са клубда вердишвилер къачузва. Иниз ам са шумуд йис идалай вилик куьч хьана. Т. Хибиев спортдин са шумуд жуьредал машгъул жезва. 2020-йисуз панкратиондай Урусатдин кубок патал кьиле фейи акъажунра ада 1-чка кьунай.