Къагьриман Ибрагьимов
Сифтегьан классрин муаллимвал кьетIен пеше, еке жавабдарвал я. Аялар кIан хьунин гьисс авачирдакай муаллим хьун намумкин я. Зегьметдал рикI хьун- им муаллимвилин пешедин гьар йикъан кIвалах я.
Къе чун вичикай рахазвай Назимат Маликовна Гьажиевадин рикI муаллимвилин пешедал фадлай ацукьнавай.
1961-йисуз СтIал Сулейманан райондин Герейханован тIварцIихъ галай совхоздин 1-отделенида багъманчидин хизанда дидедиз хьайи ам гьазурлухвилин классдиз гьахьна. Школа акьалтIарай 1978-йисуз Дербентдин педучилищедик экечIна ва 1982-йисуз ам хъсан къиметралди акьалтIарна.
Вичин пешедай хуьре чка тахьуниз килигна, ам консервиярдай заводда бригадирвиле кIвалахал акъваззава.
Кьисметди ам Ярагъ-Къазмайрал акъудна — музыкант Фикрет Гьажиевахъ галаз цIийи хизан кутуна.
1983-йисуз Н.Гьажиевадикай Ярагъ-Къазмайрин ясли-бахчада тербиячи жезва. Са йисалай ам хуьруьн юкьван школадиз хъфизва. Гьа йикъалай гилалди ам сифтегьан классрин муаллим ва классдин руководитель я. Назимат муаллимди рикIел хкизвайвал, ам хъсан муаллимар авай коллективдиз аватна. Гьелбетда, четинвилерни хьана, ятIани 41 йисан кIвалахда ада садрани хкянавай пешедин патахъай гьайиф чIугунач.
— Классда авай аялриз жувакай кьвед лагьай диде, вини дережадин нуфуз (авторитет) авай кас хьун шадвалдай кар я. Школа зи уьмуьр, зи кьвед лагьай кIвал, зун виликди ялиз, «чIехи ийизвай» зи мурад я, — лугьузва ада.
Муаллим, иллаки сифтегьан классрин муаллим, анжах предметар гузвай пешекар хьана кIанзавач. Ам аялдин арадал къвезвай мумкинвилерни алакьунар хуьзвайди ва абур чириз куьмекзавайди хьун лазим я.
Назимат муаллимди гъвечIи школьникриз эдебдин, гражданвилин, ватанпересвилин тербия гун вичин кIвалахда кар алайди яз гьисабзава. Ида аялрик Ватан чIал ва культура кIан хьунин гьиссер кутазва. Ада аялриз чпин сагъламвиливни гьуьрметдалди эгечIиз вердишарун метлеблуди яз гьисабзава. И карда адаз диде-бубайрини куьмекзава, аялрихъ галаз санал абуру утренникра, ахтармишунра, спортдин акъажунра иштиракзава. Диде-бубайризни аялриз Назимат муаллимди классдилай къеце мярекатар, экскурсияр тешкилзава.
З-классда кIелзавай аялдин диде Замира Сейфудиновади муаллимдин тарифзава: «Чи Назимат муаллимдихъ гьар са аялдихъ галаз рахадай тегьер жагъурунин алакьун ава. Уьмуьрда гьалтзавай четинвилеризни килиг тавуна, ада вичин чирвилер, рикIин чимивал, кIанивал чи аялриз гузва. Ам чи аялрин классдин руководитель хьунал чна шадвалзава».
«Назимат Маликовна кIвалахдив яратмишунардай тегьерда эгечIзавай кас я, — лугьузва школадин завуч Аскер Гьасанова. — Ам гьамиша тербия гунин кIвалахда цIийи къайдаяр жагъуриз, вахтунихъ галаз кам камуна аваз физ алахъзавай муаллим я…».
Н.Гьажиевади, тарсариз гьазур жедайла, интернетдикайни менфят къачузва.
Аялри гьар йисуз гьар жуьре конкурсрани предметрин олимпиадайра иштиракзава ва приздин чкаярни кьазва. Абурун арада Халисат Имирсадикьова, Амир Абасов, Алина Азизова, Элина Агьмедова, Пирмегьамед Къазагьмедов ва Аида Гьажиметова ава.
Ам вичин чирвилерни хкажунал машгъул я. И йикъара ада кьилин категория патал агалкьунралди имтигьан вахкана.
— Зун патал виридалайни кьилин шабагь, школадиз фейила, аялрин чина авай шадвал, классдиз гьахьайла, аялрин вилера авай хъвер, абуру кIватнавай гатфарин сифте цуькверин кIунчIар я. Мадни чпин рикI алай муаллимдикай кхьизвай сочинение, чпин гъилеривди чIугуна, багъишзавай шикилар, гьакIни регьимлувиляй, къайгъу чIугунай, разивал къалурун я, — лугьузва Назимат Маликовнади.
Школадин директор Фезина Аюбовади къейдзавайвал, Назимат Маликовнадихъ кIвалахдик сифте кьил кутадай бажарагъ ава. Ам эдеблу, масадан рикIикай хабар кьадай, зегьметдал рикI алай, чIехи дережадин культура авай муаллим я. Иниз килигна адаз кIвалахдин юлдашрин, ученикрин ва диде-бубайрин патай гьуьрмет ава.
Назимат Маликовна школадин дирекциядин, райондин образованидин управленидин патай грамотайрин сагьиб я. 2023-йисуз ам «РД-дин образованидин отличник» лагьай тварцIиз лайихлу хьана.
Назимат Гьажиевадин хизанда кьуд велед ава. Наиради Махачкъалада больницада, Исмиради ингилисни араб чIаларин муаллим яз Москвада, Фаиради Нижний Новгородда дерлекчивиле кIвалахзава. Наримана Москвадин автодорожный институтда кIелна. Уьмуьрдин юлдаш Фикрета хуьруьн «Улыбка» ясли-бахчада музыкадин рекьяй зегьмет чIугвазва. Абур цIуд хтулдин бахтлу бадени буба я.
