И йикъара РФ-дин МЧС-дин РД-да авай Кьилин Управленида идаради алай йисан сад лагьай паюна кьиле тухванвай кIвалахрин нетижаяр кьуниз талукьарнавай совещание кьиле фена.
Совещанидал Управленидин векил Сулейман Рамазанова авур ихтилатрай малум хьайивал, январь-июнь варцара республикадин цIаяр хкадардай ва къутармишдай подразделенийри цIаяр кьур — 1317 ва аварияр хьайи 620 дуьшуьшдин нетижаяр арадай акъудунин кIвалахра иштиракна. Гьайиф хьи, бедбахтвилин дуьшуьшрин нетижада 78 кас телеф хьана, хирер-кьацIар хьайибурун кьадар саки 1000-дав агакьна.
Гуьгъуьнлай совещанидал рахай Управленидин пешекар Анвар Анварова къейд авурвал, алай йисан сад лагьай паюна Дагъустанда цIаяр кьур 1479 дуьшуьш арадал атана. Кьилин себебрик электричестводин куьмекдалди кIвалахзавай алатар хатасузвилин къайдайрал амал тавуна ишлемишун, токдин, газдин пичер дуьз къайдада кардик кутун тавун, цIув жавабдарсузвилелди эгечIун акатзава.
Ада гьакIни агьалийрин арада гъавурдик кутунин кIвалах тухун патал Управлениди кьабулзавай серенжемрикай ва абурун нетижайрикайни лагьана.
Агьмед Магьмудов
