Алатай гьафтеда РД-дин здравоохраненидин министр Татьяна Беляева Ахцегь райондиз мугьман хьанвай. Ина ам муниципалитетдин кьилин духтурханадин, стационардин, поликлиникадин кIвалахдихъ галаз таниш хьана, духтуррихъ галаз гуьруьш кьиле тухвана.
Идалай гъейри, министрди дагълух райондин духтурхана дарманралди таъминарнавай гьал ахтармишна. Агьалийриз медицинадин рекьяй ийизвай къуллугърин ери чирун патал ада гьакIни духтурханада сагъламвал мягькемар хъийизвай азарлубурувай хабарар кьуна.
Къейд ийин хьи, мукьвара Ахцегьрин ЦРБ-да кьилин духтур дегиш хьанва. Милли «Здравоохранение» проектдин сергьятра аваз, духтурханадиз санитарный цIийи улакьни диагностика ийидай цIийи тадаракар чара авунва.
Гуьгъуьнлай Т.Беляевади муниципалитетдин администрацияда РД-дин здравоохраненидин коллегиядин заседание кьиле тухвана.
