Дагъустандин лежберри алай йисуз 230 агъзур тонндилай гзаф техил кIватI хъувуник умуд кутунва. Им идалай вилик квай йисан кьадардилай 5 процентдин гзаф я, хабар гузв РД-дин хуьруьн майишатдин ва недай суьрсетдин министерстводи. Техилдин бегьер кIватIунин кIвалахар гзаф районра гьеле июндин эхирра башламишна.

Республикадин вилик, санлай къачурла­, тахминан 91 агъзур гектардай зулун магьсулар кIватI хъувунин месэла ква. И майданрин са паюнив агакьна Хасавюрт (19 агъзур га), Къарабу­дахкент (11 агъзур га), Ногъай (9,5 га) ва Къизляр (8 агъзур га) районрал гьалтзава. Санлай къачурла, техил цанвай чилер арандинбур я.

Къейд ийин хьи,  2024-йисуз  Дагъустанда  зулун магьсулар цадай чилерин кьадар 373 агъзур гектардив агакьдалди гегьеншарун пландик кутунвай. Амма, гьавадин шартIар къулайсузбур­ хьун себеб яз, и кар анжах 93,4 процентдин кьадарда аваз тамамарна. Майдин вацра кьиле тухвай ахтармишунри бегьер разивал ийиз жедай гьалда авайди тестикьарнай.

Кьилди къачуртIа, министерстводин делилралди, зулун магь­сулрин 63,3 процент — хъсан, 33,7 процент — рази жедай гьалда авай, анжах 3 процент — чIуру гьалда.

Техилдин бегьер вахчунин кардал тахминан 430 комбайн ва пар чIугвадай 400 машин желбнава. Техил михьдай техникани тамамдиз гьазур я.

Гатфарин магьсулар патал цIинин сезонда тахминан 73,2 агъзур гектар чил чара авунвай. Идакай прунз цанвай чилери 31,7 агъзур гектар кьунва. Санлай къачурла, гатфарин магьсулар цIи 227 агъзур гектарда цанва. Абурулай гъейри, 41,1 агъзур гектардин чилер салан майвайри кьунва: 19,7 агъзур га  — картуфри, 28,2 агъзур га — гзаф йисарин набататри, 7,5 агъзур га — къарпузри ва 51 агъзур га — са йисан набататри.

Тумарикай рахайтIа,  гатфарин магьсулар (чIахарин культураяр) цун патал республикадихъ цIи 12 агъзур тонн тумарин игьтияж авай. Пешекарри ахтармишайдалай кьулухъ малум хьайивал, 98 процент тумар  цун патал кутугай гьалда авай. 2 процентдик кьадардилай гзаф зирзибил квай — майишатар тумар михьунин гьерекат тикрар хъувунин патахъай тагькимарна.

Жасмина  Саидова