Къадир Рамазанов
(1929-1998)
Докъузпара райондин Филерин хуьре дидедиз хьана.
Дербентдин педучилищеда ва Краснодар шегьерда культурадин институтда кIелна. Ахцегь, Докъузпара, Мегьарамдхуьруьн районрин газетрин редакцийра ва культурадин идарайра кIвалахна.
Къадир Рамазанов ватандикай, тIебиатдикай кхьенвай шиирринни поэмайрин ва абурукай ибарат «Самур, зи Самур!», «Баркаван Самур», «Зи манияр» кIватIалрин автор я. Ам милли месэлайрикайни къерех хьанвачир. Са шиирда ада кхьизва:
Са вахтара мани авай сивера:
Самурдин яд физва лугьуз Бакудиз.
Жин къекъвена чи дуствилин сирера:
Куьре, Къуба сад-садавай къакъудна.
Адан бязи чIалар («Сусан булах» ва масабур) манийриз элкъвенва.
Мирзали Рустамов
(1929 — 2016)
КцIар райондин Яргунрин хуьряй я. Бакуда пединститут куьтягьна, ада яргъал йисара хуьре муаллимвал авуна.
Са жерге гьикаяйринни пьесайрин автор я. Пьесаяр хуьруьн клубда, КцIарин халкьдин театрди эцигна. Комедия «Ашнабазхана» Лезги театрдини сегьнеламишна.
