Мукьвара Кабардино-Балкария Республикада СССР-дин спортдин мастер Казбек Панагьован гьуьрметдай самбодай Вирироссиядин турнир кьиле фена. Терекдиз уьлкведин виридалайни хъсан спортсменар атанвай. Абурун арада ери-бине Кьасумхуьрелай тир универсальный женгерай 4-сеферда дуьньядин чемпион, дзюдодай Россиядин Кубокдин сагьиб, Дагъустанда сад лагьайди яз самбодай Россиядин чемпиондин тIвар къачур Аслан Къурбановни авай.
Чи ватанэгьлиди акъажунра 88 килограммдин заланвилин категориядай галаз-галаз 4 бягьс кьиле тухвана ва вири гъалибвилералди акьалтIарна. Нетижада А.Къурбанов 1-чкадиз лайихлу хьана ва гъалибчидиз кубок, медаль, пулдин пишкеш гана.
Чна чемпиондиз нубатдин агалкьун мубаракзава ва адахъ спортдин рекье мадни еке агалкьунар хьун алхишзава.
Хазран Кьасумов
