Алай йисан 20-июлдилай Россиядин премьер-лигадин цIийи сезон гатIунзава. Футболдин матчриз фидай билетар маса къачун ва къугъунриз килигун патал гила Fan ID — болельщикдин карта — герек жеда.
Болельщикдин карта (адаз гьакIни болельщикдин паспорт лугьузва) адан сагьибдиз спортдин акъажунриз килигдай мумкинвал гузвай электронный документ я. Сифте яз ихьтин карта уьлкведа 2014-йисуз Сочида Олимпиададин къугъунра кьиле фейи чIавуз кардик акатнай. И цIийивилин кьилин макьсад акъажунра хатасузвал таъминарун тир. 2021-йисуз РФ-дин Госдумади и документ къанундалди тестикьарна.
Алай вахтунда Fan ID кьве жуьреда къачуз жеда: «Госуслуги» порталдай ва я МФЦ-дай. Ам гьелелиг рекъемрин кIалубда (цифровой формат) аваз гузва. Документ «Госуслуги» порталда авай хсуси кабинетда «Документы и данные» разделда хуьзва. Болельщикдин паспортда адан нумра, ам ганвай вахт ва адан сагьибдин тIварни шикил къейднава.
МФЦ-дай ихьтин карта къачун патал «Госуслуги» порталда хсуси кабинет хьун шартI я. Эгер болельщикдин паспорт къачузвай касдихъ ам авачтIа, МФЦ-дин пешекарди кабинет арадал гъида. Гуьгъуьнлай ада махсус арза ацIурда ва карта къачузвайдан шикил яда. 3 йикъан вахтунда «Госуслуги» порталда авай хсуси кабинетда документ пайда жеда.
Къейд ийин хьи, карта спортдин акъажунриз килигзавайбуру, мугьманри, персоналди, гьатта СМИ-рин векилрини — вирида къачуна кIанзава. Аялризни ихьтин карта хьун шартI я. Абуруз ихьтин документ хайивилин гьакъиндай гузвай шагьадатнамадин куьмекдалди диде-бубади туькIуьрзава.
Чи мухбир
