ЧIалахъ тежедай кар
Дяведин вахтара, фронтдай катна, тамара чуьнуьх хьанвай КъудуцI, хурушум жезвай вахтунихъ галаз тамукай хкечIна, мукъаятдиз хуьр галай патахъ фена. Йифен са арадилай ам вичин лап кIеви дуст яз хьайи Къириман варарихъ атана. Вар гатана, вич купIарин тикъилдин кьулухъ чуьнуьх хьана акъвазна. Къецел экъечIайди Къирим тирди якъин хьайила, ам адан къаршидиз фена…
Пакамахъ кьецIи Къирима, хкунихъ вичин костюмар галамачиз акуна, папавай абур ада гьиниз авунва лагьана хабар кьуна. КIвал тирвал къекъвена, амма костюмар абуруз гьат хъувунач. Эхир папа лагьана:
— Я итим, къачагъ кIвализ ахъаяйди вун хьайила, костюмар квахьунин силис вуна завай кьазвани? Сенфиз кIваляй хъфидайла, гъил авуна жеди ман КъудуцIа, къачагъди?!
Итим са кьадар хияллу хьана. Эхир ада вичин папаз лагьана:
— КъудуцI къачагъ я, паб. Кьан чна, гьакI я. Адалай гъейри, мад чи кIвализ атай касни авач. Сенфиз за и жуван гъилералди хкунихъ акалай костюмар къе амач.
Ам са тIимил кисна, ахпа давамарна:
— ЧIалахъ жедай кар туш, я паб. Там — костюмар. Ламран хци севериз дамахар ийизвани?!
Сабир Эфендиев, Штул
