11-июлдиз Махачкъалада, «Россия — зи тарих» паркуна, РД-дин Кьил Сергей Меликован иштираквал аваз образованидин рекье кьетIен агалкьунар хьанвай школьникар тебрикунин мярекат кьиле фена. Аниз республикадин вири районрай тир 70-далай гзаф бажарагълу жегьилар кIватI хьана. Абурун арада авай: — ГИА-дин нетижада 100 балл къачур 11-классрин выпускникар; ГИА-дин нетижада кьвед ва мадни гзаф тарсарай 95-99 баллар къачур 11-классрин выпускникар; жуьреба-жуьре конкурсрин гъалибчияр. Санлай къачурла, госаттестациядин нетижада 2024-йисуз республикада 49 выпускникди 100 балл къазанмишнава, 95- 99 балл (2 тарсунай ва мадни гзаф) — 22 выпускникди.
Республикадин Кьили къейд авурвал, алай йисуз ГИА-дин нетижада виниз тир баллар къачур выпускникрин кьадар са шумуд сеферда гзаф хьанва, гьа са вахтунда 3 касдиз 100 баллдин къимет санлай кьве тарсунай ганва.
Республикадин Кьили Дагъустандин аялрихъ жуьреба-жуьре конкурсра жезвай агалкьунрикайни лагьана.
«Гьар йисуз чи аялри Вирироссиядин мулкунал кьиле физвай яратмишунрин конкурсра, олимпиадайра, маса акъажунра иштиракзава. Тек са Сиражудин Агьмедханован — Новолак райондин ЦIийи Къулидин 7-классдин ученикдин международный «Чан алай классика» конкурсдин финалда гъалибвал квяй я! 60 уьлкведай ва Россиядин 88 региондай тир 500 аялдин арада чи Сиражудин гъалиб хьана!», — лагьана ада.
«Муаллим яз, заз мектеб хъсандаказ акьалтIарунин къимет чизва. Чирвилерихъ чIугу, викIегьвал ая! Россиядин гележег куь гъиле ава. Югъур хьуй квез!», — лагьана мярекатда иштиракай Госдумадин депутат Нурбаганд Нурбагандова.
Тебрикдин гафар гьакI маса пешекарри, мектебрин директоррини лагьана.
Мярекатдал бажарагълу аялриз сертификатар гана. ИкI, 6 выпускникдиз 200 агъзур манат ва 54-даз — 100 агъзур манат пишкешна.
Жасмина Саидова
