Ич тарцивай яргъаз аватдач. Халкьдин камаллу и мисалдин гьахълувал Хив райондин Сенгеррин хуьруьн юкьван мектебдин муаллим — Шамсудин Шамован невейриз фикир гайила нубатдин сеферда тестикь жезва. Адан хтулдиз — Шамова Мадина Энверовнадиз — и йикъара кьиле фейи шад мярекатдал Дагъустан Республикадин Кьил Сергей Меликова чирвилер къачунин рекье хьанвай акьалтIай агалкьунрай шабагь (100 агъзур манат) ганва. Мубаракарай!
Махачкъалада чIехи хьанвай Мадинади республикадин тIвар-ван авай мектебрикай сад — РД-дин «Бажарагълу аялар патал республикадин гзаф рекьерай чирвилер гузвай лицей-интернат» (ГБОУ РД «РМЛИ ДОД») лап хъсан къиметралди акьалтIарнава ва къизилдин медалдиз лайихлу хьанва. ИкI, ЕГЭ-дин нетижайралди, Мадинади химиядай — 100 балл, урус чIалай — 97 ва биологиядай 90 балл къазанмишна, математикадай — «5». Руш гъвечIи чIавалай чирвилерихъ къаних тирди мектебда кIелзавай йисара къазанмишнавай гзаф кьадар грамотайри, дипломри, чухсагъулдин чарари тестикьарзава.
Мадинади дидедин пеше хкянава — адан мурад савадлувилихъ рехъ Москвадин И.М.Сеченован тIварунихъ галай госмедуниверситетда давамарун ва духтурвилин баркаллу пешедин сагьиб хьун я. Вичин ери-бине Мегьарамдхуьруьн райондин Муьгъверганрин хуьряй тир диде Тамилади сифтедай медицинадин колледж, ахпа мединститут агалкьунралди акьалтIарна, Махачкъаладин аялрин больницада духтур яз кIвалахзава.
Бубади, илимрин кандидат, Дагъустандин гостехуниверситетдин высший математикадин кафедрадин доцент Шамов Энвер Шамсудиновича, вичин веледрин агалкьунрал иллаки дамахзава — ада чIугур зегьметди бегьер гъизва. Мадинадин чIехи стха Марата Санкт-Петербургдин промышленностдин технологийрин ва дизайндин госуниверситетда лап хъсан къиметралди кIелзава.
Амина Муслимова
