Уьмуьр, яшайиш хъсан патахъ элкъвейла, виликан татугайвилер, перишан, кIевера гьатай йикъар рикIелай алатда. Зун агъунва, 23-июндиз Дербентда, Махачкъалада хьайи мусибатдин вакъиайри гзафбурун рикIел 2000-йисар хкана. Террористри, экстремистри, «тамун стхайри» вири республика къурхулувилик кутунвай. Иллаки Дагъустандин Кеферпатан районра, шегьерра, Махачкъаладани кваз, терактар, кьиникьар, тахсиркарвилер жезвай: 2005-2008-йисара яракьламиш хьанвай бандитар Кьиблепатан Дагъустандин районризни акъатна.
Абуру чпин алчах крар Дербентдилай гатIунна. 2007-йисан зулухъ террористри полициядин идарадал гьужумна. Полициядин капитан кьена. Бандитрин гелеваз фейи МВД-дин, ФСБ-дин къуллугъчияр Табасаран райондиз акъатна. Бандитринни къайдаяр хуьдай органрин работникрин арада халис женг кьиле фена. Бандитрикай са шумуд кас телеф хьана, пуд кьуна.
2008-йисан февралдиз Дербентда, Мегьарамдхуьруьн ва СтIал Сулейманан районра яракьлу дестеяр пайда хьанва лагьай хабарди Кьиблепатан Дагъустандин агьалийрик къалабулух кутуна. Ахпа малум хьайивал, Дербентда къайдаяр хуьдай органрин къуллугъчийри бандитар авай чка чирна ва анаг элкъуьрна кьуна. Абуру гъилер хкажнач, яракь худда туна. Кьве террорист кьена, садалай катиз алакьна.
Кьве югъни алатнач, террордин актара иштиракайвиляй шак физвай са шумуд кас Докъузпара райондин Авадан хуьряй жагъана. Абуру «рей це» буйругъ кьилиз акъуднач, полицейскийриз гуьлле гана. Яргъал тефей женгина 2 террорист кьена, пуд кьуна.
Са шумуд йикъалай Мегьарамдхуьруьн райондин ЦIелегуьнрин хуьруьн къваларив яракьлу десте пайда хьанвайдакай хабар атана. Гьасятда тежрибалу къуллугъчияр ЦIелегуьндал рекье гьатна. Бандитар абуруз жагъанач, амма маларин фермадивай 500 метрдин яргъай хьиз террористрин блиндаждал ацалтна. Ана 5 гранатомет, хъиткьинардай шейэр, маса яракьар, араб чIалал ктабар, брошюраяр, военный топографиядай, медицинадай ктабар, рация, сотовый телефонар, месер, чантаяр (рюкзакар), лацу порошок авай.
Чпин магъара полицейскийрин гъиле гьатнавайдакай хабар хьайи бандитри, хтана, абурал гранатар гадарна. Кьве къуллугъчидал хирер хьана.
Пуд йикъалай са шумуд бандит СтIал Сулейманан райондин Испикрин хуьруьн мулкунай акуна. Гуьгъуьна къайдаяр хуьдай органрин итимар авайди чизвай террористар Кьурагь, Агъул районрин дагълариз акъатна. Абуру Тпигъа, Табасаран районда къайдаяр хуьдай органрин къуллугъчийрал гьужумна. Идараяр хъиткьинарна. Террористри кIириви викIегь хва Зейнудин Батманов телефна.
Гьелбетда, ислягь инсанар, аялар, яшлубур, государстводин законар гьисаба авачирбурун зиянлу гьерекатар яргъалди фенач. Вири чпиз къвезвай жазадив агакьна. Гилани гьакI жеда.
Хийир Эмиров
