Дагъустан Республикадин электросетрин комплексда гьалар пайгардик хьунал гуьзчивал тухузвай федеральный штабди региондин энергетикрал къанунсуздаказ майнингрин кIвалахар кьилиз акъудзавайбур мадни винел акъудун ва агьалияр датIана электричестводалди таъминарун тапшурмишнава. Идакай РФ-дин энергетикадин министерстводин телеграм-каналди хабар гузва.
Идалай вилик «Россети Северный Кавказ» тешкилатди хабар гайивал, Дагъустанда саки 200 миллион манатдин электроэнергия чуьнуьхнавайди винел акъуднай. ИкI, алай йисан 1-кварталда Дагъустандин мулкарал электроэнергия чуьнуьхунин 880 дуьшуьш тайинарна. Ибурулайни гъейри, криптовалютадал машгъул майнинг-фермайри электричество чуьнуьхнавай 18 дуьшуьш винел акъудна.
Электроэнергиядихъ галаз алакъалу яз, республикада алатай йисарани арадал атай месэлаяр гьялун патал РФ-дин энергетикадин министерстводи эвелимжи серенжемрин программа тестикьарнава.
«Лезги газет»
