Дагъвияр ислягьвал кIани, низам-ахлакь авай, мугьманперес инсанар тирди виридаз чизва. Абур жумарт, рикI хци, уьтквем, ватанперес инсанарни я. И кар Украинада кьиле тухузвай дяведин махсус серенжемда иштиракзавай дагъви халкьдин цIудралди векилрини ачухдиз къалурзава. СВО-да сифте йикъарилай иштиракзавай капитан Фазил Наврузовакай (КIварчагъ) ва мукьвара, икьрар кутIунна, фенвай Альберт Агьмедовакай (ЦIийи Макьар) суьгьбет ийиз кIанзава.
Фазил Наврузовакай кхьиз эгечIайла, рикIел Забит Ризванован поэмадин цIарар атана:
Ватан дарда авай чIавуз,
Гьай тагудай инсан женни?…
Халкь саламат хьун паталди
Фин тийидай аслан женни?
Хура асландин рикI авай кIварчагъвидивай, Ватан хаталувилик акатайла, секиндиз акъвазиз хьанач: ам махсус серенжем башламиш хьайи сифте йикъарилай вилик жергейра ава. Алай вахтунда кьегьал хци танкарин армиядин 2-мотострелковый дивизиядин ротадин командир яз къуллугъзава.
2022-йисан сентябрдин вацра Изюм шегьердин патарив кьиле фейи женгинин гьерекатра адал хер хьана. Госпиталда сагъар хъувурдалай гуьгъуьниз капитан Наврузова махсус серенжемда иштиракун давамзава.
Ватандин итижар хуьнин карда къалурай дирибашвиляй ва уьтквемвиляй Фазил Наврузоваз «Махсус серенжемдин иштиракчидиз», «Женгина тафаватлу хьунай» ва Суворован медалар ганва.
Мукьвара хайи хуьруьз отпускдиз хтанвай капитан Фазил Наврузовахъ галаз КIварчагърин хуьруьн администрациядин кьил Завидин Загьирбегов гуьруьшмиш хьана, кьегьал хцин дерди-гьалдикай хабар кьуна, адахъ мягькем сагъвал хьана кIанзавайди лагьана.
* * *
Фазил Наврузов хьтин ватанперес рухвайрилай чешне къачуна, гзафбур гуьгьуьллудаказ СВО-дин зонадиз физва. Ахьтинбурун арада ЦIийи Макьарин хуьряй тир 49 йисан яшда авай Альберт Агьмедовни ава. Ам «Каспий» батальондик экечIнава. И кардин тереф адан хизанди ва дустари, гьакIни райондин кьиле авайбуру хвена.
Райондин администрациядин Кьилин жемиятдин хатасузвал хуьнин рекьяй заместитель Абуталиб Фатулаев А. Агьмедовахъ галаз гуьруьшмиш хьана. Фатулаева къейд авурвал, «Каспий» батальонди стратегиядин метлеб авай везифаяр тамамарзава. Батальонда къуллугъзавайбурухъ галаз алакъалу вири месэлаяр Дагъустандин Кьил Сергей Меликован кьетIен гуьзчивилик ква.
Ватандин итижар патал къуллугъ ийиз физвай ватанперес дагъвидиз бюджетдай 100 агъзур манат пул, алава яз, мергьяматлувилин «Умуд» фондунин патайни 100 агъзур манат пул гана. ГьакIни адав республикадин бюджетдай са сеферда гузвай 200 агъзур манатни агакьда.
Хазран Кьасумов
