20-июндилай, уьлкведин вири мулкунал хьиз, Дагъустандин вузрини чпин ракIарар ачухнава ва абитуриентрин документар кьабулунин кIвалах башламишнава, хабар гузва РД-дин образованидин ва илимдин министерстводи. Алай йисуз абитуриентривай бакалавриатдин программайрик экечIиз, гьакIни ругуд вузда кьилин образованидин цIийи къайда ишлемишиз жеда. РикIел хкин: цIийи къайдадин бинедаллаз «бакалавриат» «высший» ва «пешекарламишнавай высший» («магистратурадиз ухшар) образованидалди эвезнава. Виниз тир образование къачун патал документар вугудай гьар жуьредин мумкинвилер ава: вуздин сайтдин, «Госкъуллугъар» порталдин, Россиядин почтадин куьмекдалди ва я кьабулдай комиссиядив гъиляй-гъилиз.
И йисуз ЕГЭ-дин нетижайрал алава тир баллар гудай кьилдин агалкьунрин сиягь гегьеншарнава. Гила абурук акатзава: гимишдин медаль, Россиядин чемпиондин дережа, военный къуллугъ кьилиз акъудун, гьакIни гуьгьуьллубурун жергейра аваз СВО-да иштиракун.
1-майдилай гьакIни тайин макьсаддалди кьабулунин (целевой) къайдани дегиш хьанва. Гила кIвалахдалди таъминарзавайбурун вири теклифар «Россияда кIвалах» сад тир платформада кIватIнава (ам «Госкъуллугъар» порталдихъ галаз алакъада ава). И карди абитуриентдиз гележегда вич кIвалахдалди таъминардайди онлайн-къайдада жагъурдай ва адахъ галаз тайин макьсаддалди кIелиз рекье тунин гьакъиндай электронный къайдада икьрар кутIундай мумкинвал гузва. Чир хьун важиблу я: ихьтин икьрар гила абитуриент вуздик экечIайдалай кьулухъ кутIунзава.
Къейд ийин, уьлкведин вузра виридалайни мукьвал-мукьвал хкязавай хел IT-пешекарар яз ама. Россиядин рекъемрин жигьетдай вилик финин министерстводин делилралди, гьеле исятда тахминан 10 процент выпускникар IT-пешейрин сагьибар я — 2019-йисалай талукь тир хилера бюджетдин гьисабдай тир чкайрин кьадар 2,5 сеферда гзафарнай. И карди Россиядин йигиндаказ виликди физвай экономика патал пешекар кадрияр гьазурдай ва идалди технологийрин жигьетдай уьлкведин аслу туширвал гегьеншардай мумкимнвал гузва.
Жасмина Саидова
