Россиядин мулкунал 22-июндиз къейдзавай РикIел хуьнин ва хажалатдин йикъан вилик Москвада Вирироссиядин «Вахт алат тийидайди: муьтIуьгъариз тахьайбур» конкурсдин нетижаяр кьунин мярекат кьиле фена. Мярекатдал СССР-дин ислягь агьалияр терг авун патал немсеринни фашистрин чапхунчийри ва абурун терефдарри тухвай миллетчивилин дяведин къурбандар рикIел хуьнин макьсаддалди, гьакIни тарсара ва тарсарилай гуьгъуьниз тешкилай мярекатрин, серенжемрин авторриз шабагьар гана.
Конкурс социальный активлувал ва коммуникацияр еримлу авунин рекьяй алишверишдинди тушир автономный «Социальный технологийрин ва коммуникацийрин агентство» тешкилатди (АСТИК) ва Россиядин Общественный палатадин гуьгьуьллувиляй ва жегьилрин сиясатдин рекьяй комиссияди тешкилнавай.
«Вирироссиядин «Вахт алат тийидайди: муьтIуьгъариз тахьайбур» конкурс АНО АСТИК-дин командади алай йисуз арадал гъанва. Ватандин ЧIехи дяведикай, миллетчивилихъ галаз женгиникай тарихдал бинеламиш тир гьахъвал, керчеквал гегьеншдаказ раиж авун патал вири уьлкведин гзаф кьадар бажарагълу муаллимри чпин авторвилин фикирар уьмуьрдиз кечирмишуни чун иллаки шадарзава. Чун конкурсда гъалиб хьайи ксарин ва авторрин сифтегьан 50 разработка (абурун хсуси теклифар ва рекьер) вири уьлкведин мулкунал тIем акакьдайвал кардик кутаз алахъда. И кар патал виридалайни хъсан кIвалахрин электронный кIватIал туькIуьрда. Жемиятдин вилик чи неинки жавабдарвал арадал гъуникай, гьакIни жуван чирвилер, тежриба, гьиссер чи акьалтзавай жегьил несилдив агакьаруникай ибарат тирди гьамиша рикIел хвена кIанда», — лагьана мярекатдал АНО АСТИК-дин директор, гуьгьуьллувиляй ва жегьилрин сиясатдин рекьяй ОПРФ-дин Комиссиядин председателдин заместитель Елена Родионовади.
Конкурсда тербияламишунин ва насигьатчивилин хилерин 500-далай гзаф пешекарри, чирвилер къачузвайбуру ва студентри иштиракна. Конкурсдин нетижада 11 гъалибчи ва чпин кIвалахар виридалайни хъсан проектрин кIватIалда гьатдай ТОП-50 иштиракчи хкянава.
Виридалайни хъсан кIвалахрин арада ава: жуьрэтлувилин тарсарин сценарияр, саналди тир ахтармишунрин проектар, СССР-дин ва Германияди чапхунай маса уьлквейрин мулкарал кардик хьайи концлагеррин тарихдиз, фашистри уьлкведин ислягь агьалияр терг авуниз, Ленинграддин блокададиз талукь интерактивный мярекатар. Конкурсдин вири кIвалахар АНО АСТИК-дин сайтда чапда.
Дагъустандин патай конкурсда Дербент шегьердин «Прогимназия «Президент» МБОУ-дай тир лезги муаллимди — Магьмудова Дилара Раидиновнади иштиракна ва гъалибвал къазанмишна. Дилара Магьмудовадин авторвилин кIвалахдиз конкурсдин жюриди виниз тир къимет гана. Къейдна кIанда хьи, Дилара Раидиновна акьалтзавай несил тербияламишунин ва насигьатчивилин месэлайриз кьетIен фикир гузвай ва и рекье активнидаказ кIвалахзавай, уьлкведин майданра кьиле тухузвай гьар жуьредин конкурсра гьевеслудаказ иштиракзавай муаллимрикай сад я. Чна Дилара муаллимдиз и агалкьун мубаракзава, вичи хкянавай баркаллу рекье гележегда мадни виниз тир агалкьунар хьун алхишзава.
Жасмина Саидова
