Р.З.Акавован гьакъиндай Дагъустан Республикадин КьилинУказ
- Акавов Рашид Забитович Дагъустан Республикадин печатдин ва информациядин министрдин везифаяр вахтуналди тамамарзавайдан къуллугъдикай азадин.
- И Указ вичел къул чIугур йикъалай къуватда гьатзава.
Дагъустан Республикадин Кьилин везифаяр вахтуналди тамамарзавай В.Васильев.
Махачкъала шегьер, 2018-йисан 3-август, №90
Дагъустан Республикадин информатизациядин, алакъадин ва массовый коммуникацийрин министрдин везифаяр вахтуналди
тамамарзавайдан гьакъиндай Дагъустан Республикадин Кьилин Указ
- Дагъустан Республикадин Конституциядин 78-статьядин 2-пунктунал асаслу яз, Снегирев Сергей Владимирович Дагъустан Республикадин информатизациядин, алакъадин ва массовый коммуникацийрин министрдин везифаяр вахтуналди тамамарзавайди яз тайинарин.
- И Указ вичел къул чIугур йикъалай къуватда гьатзава.
Дагъустан Республикадин Кьилин везифаяр вахтуналди тамамарзавай В.Васильев.
Махачкъала шегьер, 2018-йисан 3-август, №91
РД-дин Кьилин везифаяр вахтуналди тамамарзавай Владимир Васильева республикадин информатизациядин, алакъадин ва массовый коммуникацийрин министерстводин кьиле Сергей Снегирев тайинарнава. Лагьана кIанда, Сергей Снегирев республикадин информационный сиясатдин алемда чара кас туш. Ада “Дагпечатдиз” регьбервал гана, эхиримжи йисара РД-дин печатдин ва информациядин министрдин заместителдин везифаяр тамамарзавай.
Виликан министр — Рашид Акавова вичин асул кIвалах давамарда. Ам филологиядин илимрин доктор я. Министрдин къуллугъдал тайинардалди, ам ДГПУ-дин культурадин ва искусстводин Институтдин кьиле авай ва ДГУ-дин филологиядин факультетдин электронный СМИ-рин кафедрада кIвалахзавай.
6-августдиз РД-дин Гьукуматдин Председатель Артем Здунова министерстводин коллектив цIийи регьбердихъ галаз танишарна. Мярекатда РД-дин Кьилин ва Гьукуматдин Администрациядин информационный сиясатдин Управленидин начальник Зубайру Зубайруева, республикадин государстводин СМИ-рин руководителри иштиракна.
Вичин рахунра Артем Здунова къейд авурвал, алай вахтунда печатдин органрихъ галаз санал чи уьмуьрдиз информациядин цIийи IT-техноологиярни гьахьзава. Бязи регионра, къецепатан уьлквейра абур хъсандиз виликни фенва. Премьер-министрдин фикирдалди, и жигьетдай Дагъустан гуьгъуьна амукьна виже къведач. “Чна агьалийрал республикада кьиле физвай вакъиайрикай хабарар агакьарунихъ галаз санал цифровой технологиярни вилик тухвана кIанда. Мукьвал тир 50 йисан девирда тешкилзавай кIвалахдай цIийи чкаяр и хиле арадал къведа. ЦIийиз туьхкIуьр хъувунвай министерстводин вилик информациядин технологияр, печать, коммуникацияр ва алакъа вилик тухунин месэлаяр акъвазнава. Сергей Владимировичахъ и рекье еке тежриба ава ва адалай кар алай месэлаяр гьялиз алакьдайдак за умуд кутазва”, — къейдна Артем Здунова.
Ада гьакIни Рашид Акавова педагогикадин хиле зегьмет чIугун давамардайдакай, ам командада амукьзавайдакай ва санал кIвалахдайдакай хабар гана.
Рашид Акавова вичин кIвалахдиз еке къимет гунай РД-дин Гьукуматдин Председателдиз ва министерстводин коллективдиз сагърай лагьана.
РД-дин информатизациядин, алакъадин ва массовый коммуникацийрин министрдин везифаяр вахтуналди тамамарзавай Сергей Снегирева ихтибар авунай республикадин руководстводин тIварцIихъ хуш гафар лагьана. “Министерстводин коллектив зун патал хайиди я. И карди вилик акъвазнавай месэлаяр гьялунив гьасятда эгечIдай мумкинвал гузва. Санал чалай гзаф крар кьилиз акъудиз алакьда. За куь куьмекдикни умуд кутазва. Гьар са месэла санал гьялда. КIвалах менфятлуди хьуникай гьар сада фикирна кIанда”, — алава хъувуна Сергей Снегирева.
Агьмед Магьмудов
