Мукьвара Дагъустандин меркездин кьилин везифаяр вахтуналди тамамарзавай Абусупьян Гьасанов Болгариядай атанвай инвесторрихъ галаз гуьруьшмиш хьана. Мугьманри чпихъ Махачкъалада зирзибил гьялдай завод эцигдай ниятар авайдакай хабар гана ва шегьердин руководство и месэладиз талукь яз гьазурнавай проектдихъ галаз танишарна.
Инвесторри къейд авурвал, карханади цин ва пардин куьмекдалди йисан къене 180-200 тонндив агакьна зирзибил гьялда. Проектдин кьетIенвал адакай ибарат я хьи, технологийрин рекьяй ада экологиядиз кIусни зиян гудач.
Проект кьилиз акъудун патал Махачкъаладин мулкарал, хьайитIа зирзибилар гадарзавай чкайриз мукьва яз, 2,5 гектардин майдан герек къвезва. Лагьана кIанда, ихьтин заводар дуьньядин хейлин шегьерра кардик ква. Мисал яз, Парижда, Мадридда, Нью-Йоркда. Мукьвара Владикавказдани эцигиз гатIунда.
Гуьруьшдин эхирдай А.Гьасанова проект итижлуди тирди, ам тамамдаказ ахтармишна ва республикадин гьукумдин къурулушрихъ галаз веревирд авуна кIанзавайди къейдна.
«Лезги газет»
