Лезги халкьдихъ зегьметдикай камаллу мисалар тIимил авач. Месела, зегьметди берекатни гъида, гьуьрметни; къачуда зегьмет — хкудда лезет; итим кIвалахда чир жеда; пеше пачагьдизни герек я ва гзаф масабур. Галатун тийижир намуслу зегьметди чпел баркалла гъанвай ксар чи арайра тIимил авач. Ражаб Велиметович Тагьирбеговни абурукай сад я.
Ражаб 1943-йисан 23-сентябрдиз Кьасумхуьруьн райондин Цмуррин хуьре гзаф аялар авай хизанда дидедиз хьана. Буба зегьметдин фронтда авай, гзаф аялрин диде Саимата колхозда зегьмет чIугвазвай. Хизанда аялризни гьар садаз чпин везифаяр авай.
Кьасумхуьрел 8-класс акьалтIарай Ражаб 1959-йисуз Махачкъаладин зооветтехникумдик экечIзава. Ам куьтягьна, Советрин Армиядин жергейра къуллугъна. Хиве авай буржи гьакъисагъвилелди тамамарзавай жегьилди частунин, Арзамас шегьердин жемиятдин, комсомолрин уьмуьрдани активвилелди иштиракиз хьана, гьавиляй виридан патай гьуьрметни къазанмишна. Частунин пайдахдин патав шикил ягъуни, ВЛКСМ-дин Арзамас шегьердин комитетдин патай Гьуьрметдин грамота гуни, военный частунин гьуьрметдин ктабда тIвар кхьини, «Советрин Армиядин отличник», «Аскер-спортсмен» знакар гуни и кардин гьакъиндай шагьидвалзава. 1965-йисан майдиз Ражабаз «ЧIехи Гъалибвилин 20 йис» юбилейдин медаль гана.
Армиядай хтайдалай кьулухъ «Дагкниготоргда» 7-типографияда, «Полиграфобъединенида», КАСПНИРХ-да кIвалахна. 1972-йисуз, кIвалахдивай къерех тахьана, Даггоспединститут ва партиядин Дагобкомдин къвалав гвай марксизм-ленинизмдин университетдин журналистикадин факультетни акьалтIарна.
1978-йисуз «Дагъустан» ГТРК-ди теклиф авуналди, лезги чIалал передачаяр гузвай редакциядиз атана: сифте-аялринни жегьилрин передачаяр гудай, 1985-йисуз ст.редактор, 2001-йисалай кьилин редактор хьана. 1984-йисуз Москвада Вирисоюздин институтда пешекарвал хкажна.
Гостелерадиокомпанияда зегьмет чIугур 26 йисуз Р. Тагьирбегова саки вири республика кIвачелай авуна. Ада гьазурзавай «70 декьикьа», «Экуьнин ярар», «Вахтунин камар», пионерар ва школьникар патал, экологиядикай передачаяр, дяведин ва зегьметдин ветеранрикай радиоочеркар яб акалзавайбурун арада иллаки машгьур тир.
Ражаб Велиметович аялар патал ирид радиоинсценировкадин, «Эхиримжи аждагьан», «Къацу аптека», «Хъуьруьн айиб туш», «Хийирлу меслятар», «Кьиблепатан Дагъустандин дармандин набататар», «Мамуля-Бабуля», «Ажайиб кац» ктабрин автор я. Эхиримжи кьвед урус чIалаз таржума авунва.
Гзаф йисара «Дагъустан» ГТРК-дин халкьдин дружинадин командирдин заместитель яз хьана. СССР-дин, РФ-дин журналистрин Союздин члендин макъалаяр датIана республикадин газетризни журналриз акъатзавай. Ам «Лезги газетди», республикадин ветеранрин Советди, экологиядай комитетди малумарай конкурсра гъалиб хьана.
Яратмишунра Ражаб Велиметовичан агалкьунар гзаф шабагьралдини грамотайралди къейднава. 1996-йисуз ам РД-дин культурадин лайихлу къуллугъчи лагьай тIвар гуниз лайихлу хьана. Россиядин Федерациядин гьа ихьтин тIвар гун патални герек чарар-цIарар гьазурнай. Амма уьлкве чукIуруникди, «перестройка» лугьудайди башламиш хьуникди ва маса дегишвилерикди документар рекье тун тавуна амукьна. 2004-йисуз лагьайтIа, милли вещанидин вири редакторар (РФ-дин Тк-дин 81п.2 статьядай) чеб алай кIвалахрикай азадна.
Амма Ражаб Велиметович секиндиз санал ацукьун чидай кас туш. Пенсиядиз экъечIнава лагьана, уьмуьрдин активный тегьердивай къерех хьанач. 2009-йисалай инихъ ада общественный кIвалахар тамамарзава. Республикадин меркездин Советский райондин ветеранрин Советдин соучредителрикай сад ва и Советдин председателдин заместитель яз, Ражаб Велиметовича эдеб-ахлакьдин, ватанпересвилин тербия гунин рекьяй еке кIвалах тухузва. Ам гьакIни жуьреба-жуьре куьмекар гунин, мергьяматлувилин мярекатрин активный иштиракчи я. ИкI, ада жуьреба-жуьре йисара хайиди тир Цмуррин хуьруьн мектебдин библиотекадиз вишелайни виниз ктабар, картаяр, тупар, ватанпересвилин манийрин кассетаяр, хуьруьн Гъалибвилин музейдиз Советрин Союздин Игитар тир 58 касдин шикилар, цмурвийрин — дяведин иштиракчийрин марагълу материалар багъишна.
Радиода, Советский райондин ветеранрин Советда яргъал йисара кIвалахиз, республикадин мектебрин телеотрядрин, краеведрин ва гел жагъурдайбурун кIвалах раиж ийиз, Р. Тагьирбегова ТОКС-дин слетра вичини активнидаказ иштиракзава, гьавиляй ам са шумудра ТОКС-дин патай шабагьризни лайихлу хьана.
Ражаб Велиметовичан чалишмишвилералди Даградиодин къизилдин фондуна лезгийрин къадалайни гзаф машгьур писателринни шаиррин сесер, вичи гьазурай радиоинсценировкаяр, программаярни передачаяр къачунвай лентер хуьзва.
Уьмуьрда вич гьамиша пара активнидаказ тухузвай халис ватандаш, намуслу инсан, чIехи ватанперес Ражаб Велиметовичан яргъал йисарин гьакъисагъ зегьмет 10-далайни гзаф медалар, 16-далайни гзаф гьуьрметдин грамотаяр (виридан тIварар кьуртIа, хейлин чка герек жезва) гуналди къейднава. Ингье гила абурал Вирироссиядин ветеранрин тешкилатдин Гьуьрметдин знак ва «Генерал-полковник М.Т. Танкаев. За преданность Отчизне» орден алава хъхьанва. Мубаракрай! Вахъ мягькем сагъламвал, мадни агалкьунар хьун чи мурад я, гьуьрметлу Ражаб Велиметович.
Ш. Шихмурадов
