Ахцегь райондай дяведин махсус серенжемда 500-далай артух ксари кьегьал­вилелди иштиракзава. Абурукай сад инал вичикай ихтилат физвай старший сержант, стрелковый 103-полкунин «Штурм» взводдин командирдин замес­титель, фийиви Сегьерхан Мегьарамов я. Донбассда цIийи фашистрихъни­ нацистрихъ галаз къати женгера кьетIен игитвилерай ам «Пак Георгиян IV дережадин крест» ордендиз, «Женгера тафаватлувиляй» медалдиз, «Дагъустандин Халкьдин Игит» гьуьндуьр тIварцIиз лайихлу хьанва­. Къейд ийин, «Дагъустандин Халкьдин Игит» тIвар низ хьайитIани ваъ, респуб­ликадин махсус комиссиядин къарардалди Дагъустандин халкьдин вилик чIе­хи лайихлувилерай гузва. Эхь, гьахьтин кьегьал хва я Сегьерхан. Аллагьди хуьй!

Багърийрал кьил чIугун патал нубатдин сеферда хайи хуьруьз куьруь рухсатдиз хтанвай викIегь аскер 20-июндиз вичин буба, «Фиярин хуьр» СП-дин секретарь Сергетахъ галаз Ахцегь райондин кьил Абдул-Керим Палчаевахъ галаз гуьруьшдиз атана. Еке гьуьрметдивди къаршиламишна абур райондин регьберди. Абурун арада хуьруьн яшайишдикай, СВО-да дагъви аскеррин викIегьвилерикай, жегьилар ватанпересвилин руьгьдаллаз тербияламишуникай ачух рикIин суьгьбет кьиле фена.

— Авайвал лагьайтIа, Абдул-Керим Наж­мудинович, Фияр вацIал эцигнавай зурба муьгъ ва дагълух чи гъвечIи хуьре инте­рактивный доскайралдини компьютеррал­ди таъминарнавай гуьзел школа хьанвайди, гьакI ял ядай ва аялар къугъвадай хъсан майдан туькIуьрзавайди акурла, квез чухсагъул талгьана, завай хъфиз хьанач. Тарифун туш, чи районда икьван чIавалди хьайи вири регьберрикай анжах са куьне фийивийрин дерди-гьалдикай хабар кьазва. Нагагь дуьзгуьн рехъ, школа, яшайишдин чарасуз маса къулайвилер авайтIа, бубайрин хайи ватан туна, жегьилар шегьеррихъ алатдачир… — разивилелди лагьана бубадини хци.

Абдул-Керим Нажмудиновича игит ас­кердизни адан бубадиз халкьдин мецелай тир хуш келимайрай ва душмандихъ галаз дяведа ватанпересвилин буржи намуслувилелди тамамарунай сагърай лагьана.

— Гьакъикъатдани, Фиярин хуьр районда гуя рикIелай ракъурнавай пипIерикай сад тир, — ихтилатзава райондин кьили. — Са сеферда куь вацIай, кIула гъуьруьн залан чувал аваз, экъечIзавай дишегьли акурла, за анал муьгъ эцигун кьетIна. Ахпа гьикI ятIани Фиярин хуьруьн спонсорвални, къаюмвални зи хиве гьатна. ЧIехи Гъалибвилин 80 йисан юбилейдин вилик чна Фия Ватандин ЧIехи дяведин ва дявейрин гуьгъуьнин вакъиайрин игитриз Баркаллувилин хъсан обелиск хкажда. Фикирдик милли архитектурадинни культурадин кьетIен памятник тир минара туькIуьр хъувун ва гзаф маса месэлаярни ква. И месэлада зи мурад сад я: чкайрал яшайишдин къулай шартIар яратмишуналди, жегьилар хуьруьн месэлайрал желбун, дагъдин хуьр кIвачIел ахкьалдарун. Тажублу кар ам я хьи, советрин девирда хуьруьн Энгельсан тIварунихъ галай колхозда агъзурралди хипер авайди тир. Исятда патара агьваллу карчияр, гьукуматдин чIехи къуллугъчияр ава, амма садани хайи хуьруьн ва хуьруьнвийрин къайгъу­дарвал авунач. За вирибуруз лугьузвай гаф сад я: чи яшайишдин месэлаяр, гъилер къакъажна, чна гьял тавуртIа, паталай атана, садани ийидач.

СВО-дин игитдихъ галаз гьуьруьшда­ гьакI дяведа чпин жегьил чанар хаталувилик кутазвай игитрикай, чи аскеррин агалкьунрикай, абурун хизанрин къайгъу чIугуникай, абуруз ийизвай куьмекрикай ва важиблу маса месэлайрикай ихтилатар кватна. Укронацистрихъни НАТО-дин чапхунчийрихъ галаз чи Ватандин азадвални аслу туширвал патал къизгъин дяве гъалибвилелди бегьем жедайдахъ Сегьерхан кIевелай инанмиш я.

Эхирдай Абдул-Керим Палчаева Сегьерханаз чандин сагъвал, руьгьдин мягькемвал, хизандин хушбахтвал алхишна. Чи кьегьалар сагъ-саламатдиз ва хурудал женгинин шабагьар алаз къаршиламишдай Гъалибвилин югъ мукьвал алайдахъ вичин инанмишвал къалурна.

Дашдемир Шерифалиев