Дагъустандивай региондиз къвезвай туристар патал хатасузвал таъминариз жеда. Терроризмдикай хуьн патал туриствилин сезондин вилик кьабулзавай серенжемри кIвалахзава. Ихьтин фикир РД-дин Кьил Сергей Меликова 24-июндиз журналистриз малумарна.
«За фикирзавайвал, чун хатасузвал таъминариз жедай гьалда ава. Гьакъикъатда Дагъустандиз мугьман хьанвай ксаривай архайинвилелди ял ягъун давамариз жедайвал», — лагьана республикадин регьберди.
Гьа са вахтунда региондин Кьили кьетIендаказ къейдна хьи, терактар кьиле финихъ галаз алакъалу яз кьабулнавай серенжемар мадни мягькемар хъийида, гьа жергедай яз республикадин мулкара жезвай ва санай масаниз сиягьатзавай ватандашрин хатасузвал патал гуьзчивал артухарунин месэлани, тади гьалда кьабулна кIанзавай серенжемарни.
«ЛГ»
