Алатай гьафтеда Докъузпара райондин Къурушдал, «Дагъвидин къуват» лишандик кваз, школайра кIелзавай аялрин арада спортдин милли жуьрейрай гьар йисуз кьиле тухун хъсан адетдиз элкъвенвай турнир кьиле фена.
Идакай чаз Къурушдилай тир Фейруз Къулиева хабар гана. Турнирда Дербентдай, Махачкъаладай, Ярославлдай, Каспийскдай, Къурушдилай, ЦIийи Къурушдилай, Ярагъдилай, Агъа СтIалдилай, Усугъчайдай, Къалажухдай, Къаракуьредай, Тпигъдилай, Хпюкьай, Бугъдатепедай, Хивдай, Ахцегьай, Руькелдилай атанвай спортсменри иштиракна. Турнир Къурушрин ва республикадин жуьреба-жуьре чкайрай тир агьалийрин спонсорвилин куьмекни галаз тешкилнавай. Къуй абурун берекатар Аллагьди артухаррай!
Спортдин серенжемдин макьсад аялар спортдал, сагълам уьмуьр кьиле тухунал желб авун, халкьарин арада дуствал мягькемарун тир. Аялри, классриз пай хьана, чукурунай, чкадилай хкадарунай, чене акъудунай ва маса жуьрейрай чпин устадвал къалурна. Гъалибчияр спортдин вири жуьрейрай къазанмишнавай баллар гьисаба кьуналди тайинарзавай. Кьилди къачуртIа, 1-чкайриз агъадихъ галай аялар лайихлу хьана: Мугьаммад Къулиев (Къуруш, 1-2-классрин арада), Амрид Къулиев (Дербент, 3-4-классрин арада), Амир Харгушев (Хпюкь, 5-6-классрин арада), Самрат Алиханов (Къуруш, 7-8-классрин арада) ва Идрис Къулиев (Къуруш, 9-11-классрин арада).
Рагнеда Рамалданова
