5-июндиз Дербент шегьердин кьилин везифаяр вахтуналди тамамардайди яз Агьмед Абусейнович Къулиев тайинарна.
2020-йисалай шегьердиз регьбервал гайи Рустамбег Пирмегьамедова вич алай къуллугъдилай элячIнавайдакай хабар гана. Ада Дагъустандин Кьил Сергей Меликоваз, сенатор Сулейман Керимоваз, Госдумадин депутат Хизри Абакароваз Дербент шегьер еримлу авунин карда иштиракдай мумкинвал гунай сагърай лагьана.
ЦIийи регьбер тайинаруникай малумарунин мярекатда Госдумадин депутат Х.Абакарова, шегьердин ва Халкьдин собранийрин депутатри, администрациядин ва идарайрин къуллугъчийри ва масабуру иштиракна.
Полициядин полковник А.Къулиева икьван чIавалди Дагъустандин МВД-дин полициядин начальникдин заместителвиле кIвалахна. Адан ери-бине Ахцегь райондин Смугъулрин хуьряй я.
«Лезги газетдин» редакциядин коллективди Агьмед Абусейновичаз цIийи къуллугъ мубаракзава ва къадим шегьердиз регьбервал гунин кIвалахда агалкьунар хьун алхишзава.
Чи мухбир
