И йикъара Москвада Вирироссиядин ктабрин «Яру Майдан» фестивалди 10-сеферда кIвалах башламишна. «Россиядин регионар» павильондин тешкилатчи Россиядин ктабар чапдайбурун Ассоциация (АСКИ) я. Дагъустан Республика ктабрин фестивалда датIана иштиракзавайбурукай сад я. Региондин стендди ва программади меркезвийрин ва мугьманрин фикир гьамиша вичел желбзава.
ЦIинин фестивалда, Дагъустандин халкьдин шаир СтIал Сулейманан 155 йисан юбилейдиз талукьарнавай проект къалуруналди, республикадин «Эпоха» ва «Дагъустан» чапханайри векилвалзава.
Фестиваль ачухуниз талукьарнавай шад мярекатда Дагъустандин информациядин ва печатдин Агентстводин регьбер Абдуразакь Жамалутдинова иштиракна.
«Дагъустандин зурба шаир СтIал Сулейманан юбилейдин мярекатра иштирак авунай куьн сагърай! Сад-садан гуьгъуьналлаз чна ахьтин мярекатар кьиле тухузва. Кьве йис вилик чна Фазу Алиевадин юбилей къейдна, алатай йисуз — Расул Гьамзатован. ЦIининди СтIал Сулейманан йис я…», — къейдна ада.
Мярекат кьиле тухузвай алим-физик ва общественный деятель Низами Абдулгьамидова рикIел хкана: «Са патахъай фикирайла, им СтIал Сулеймана авур кар тикрарун жезва. 1934-йисан августдиз шаир сифте сефер яз Москвадиз атанай. А чIавуз ина советрин писателрин 1-съезд кьиле физвай, адазни съезддиз эвер ганвай. Ам иниз атайла, гьелбетда, Москвадиз, Яру майдандиз килигна. Гьа ина, и ГУМ-да хьана ам. Ада алукIнавай тегьер акурла, Литфондуни шаирдиз 3 агъзур манат чара авунин къарар кьабулна. Им лагьайтIа, а вахтунда лап еке пул тир, галайбурал, лугьурвал, шаирдал европавийрин тегьерда пек-партал алукIун тапшурмишна».
Фестивалдин иштиракчи — Сеченован медуниверситетдин студентка Эмина Жабраиловади вич машгьур шаир СтIал Сулейманан яратмишунрал рикI алай кас тирди лагьана. Ам Яру майдандал шаирдин цIийи ктабар маса къачун патал атанвай.
Москвави Ольга Белозёрова «Москвадин лезгияр» милли медениятдин автономиядин яратмишунрин коллективрин программади гьейранарнавай. «Дагъустан заз пара бегенмиш я. Заз ана Каспий гьуьл, къадим Дербент шегьер авайди ва хъсан инсанар яшамиш жезвайди чида», — хълагьна ада. Фестиваль 9-июндиз акьалтIна.
Чи мухбир
