РФ-дин Игитдин турнир
И йикъара СтIал Сулейманан райондин Кьулан СтIалрин хуьре, Россиядин Игит Радим Халикьован экуь къамат рикIера хуьнин лишан яз, волейболдай районрин арада гьар йисуз тухузвай турнир кьиле фена.
Райадминистрациядин спортдин, туризмдин ва жегьилрин крарин рекьяй комитетди (директор — Чингиз Абдулмежидов) тешкилнавай турнирда республикадин районрин ва шегьеррин итимрин командайри алакьунар къалурна.
Турнир ачухунин, гъалибчи ва приздин чкаяр кьур командайрив шабагьар вахкунин мярекатра райадминистрациядин кьилин 1-заместитель Лацис Оружева, муниципальный къуллугърин ва идарайрин регьберри, Халикьоврин хизандин векилри, Кьулан СтIалрин юкьван школадин коллективди иштиракна.
Къизгъиндаказ кьиле фейи акъажунра СтIал Сулейманан райондин хкянавай командади — 1, Каспийскдин — 2, Курхуьруьн — 3 ва Дербентдин командайри 4-чкаяр кьуна.
Хазран Кьасумов
_____________________________
«Миграгъ» — IV фестиваль
И мукьвара Докъузпара райондин Миграгъа путарин спортдай республикадин 4-фестиваль кьиле фена. Ана Дагъустандин хейлин районрай ва шегьеррай тир спортсменри чпин устадвал къалурна.
Макьсад путарин спорт машгьурун, агьалияр сагълам уьмуьр кьиле тухунал желб авун ва дуствилин алакъаяр мягькемарун тир спортдин и серенжем ачухуниз талукьарнавай шад мярекатда Докъузпара райондин кьилин заместитель Акиф Балакишиева, Миграгърин хуьруьн кьил Акиф Демирова, РД-дин путарин спортдин федерациядин президент Магелан Саидова, райадминистрациядин спортдин, жегьилрин сиясатдин ва туризмдин отделдин начальник Имиржан Алискерова, Усугъчайдин хуьруьн имам Хуснудин Ашуралиева, путарин спортдал рикI алай ксари ва масабуру иштиракна. Ам ачухай Мискискарин хуьряй тир общественник Ариф Гьафизова ва мярекатдал рахай амай ксари фестивалдин иштиракчийрихъ агалкьунар хьун алхишна, гьар йисуз кьиле тухун хъсан адетдиз элкъвенвай и серенжем вичин макьсаддив агакьунин умудлувал къалурна.
Спортдин фестивалда Докъузпарадин — 1, СтIал Сулейманан — 2, Кьурагь райондин командайри 3-чкаяр кьуна.
Регина Семедова
