Къазахстандин лезгияр пара яшамиш жезвай шегьер Актау я. Иниз абур чIехи пай Советрин уьлкведин девирда атанай. Къе заз ина гзаф йисара яшамиш жезвай жуван таниш хизандикай, кьилди къачуртIа, Актау шегьердин агьали Идрисакай ихтилат ийиз кIанзава.
Селимов Идрис Мегьтиханович шаир Етим Эминан руш Муслиматан руш Эслидин хва я. Ам ина вичин бизнесдал машгъул жезвай сад лагьай лезги я. Ада Актаудиз яшамиш жез атай лезгийриз гьамиша куьмек гузва.
Зун адан хсуси «Мержан» тIвар алай еке ва гуьзел ресторанда къунагъламишнай. Ам лап кутугай чкадал, Каспийдин ценерив гвай. «Мержандиз» неинки са къазахар мугьман жезвай, иниз гьакIни Бакудай самолетда аваз инсанар ял ягъиз къвезвай.
Гила а ресторан алай чкадал Идриса 60 квартирадин еке кIвал хкажнава — анай шегьерни гьуьл капунал алайбур хьиз аквазва. Зулун эхирдалди вири кIвалахар куьтягьдайвал я. Ана кIаник машинар патал чкаяр, винел 2 жергеда туьквенар, офисар, къавални шуьшедин ресторан жеда, кIвалерни маса гуда. Ада и дараматдиз вичин дидедин — Эслидин тIвар ганва. Идриса заз лагьайвал, «Эслидин кIвале» са шумуд квартира, паталай атай лезгийривай ял гъиз жедайвал, мугьмандин тавхана хьиз, пулсуз ишлемишиз вугуда. Идалайни гъейри, адаз бубадин ватандани халкь патал лазим крар ийидай фикир ава. Мумкин я, Етим Эминан тIварцIихъ галаз алакъалу яз, мектебра ва гьакI шаиррин арада конкурсарни тухуда.
Идрисан фикирриз Аллагьди вичи къуват гурай, кьилиз акъатрай. Чна лугьудайвал, «Эслидин кIвал» — къени, ана яшамиш жедай хизанарни бахтлу хьурай.
Бикеханум Алибегова
