1-июнь — Аялар хуьдай международный югъ
Гатун сад лагьай юкъуз дуьньядин са кьадар уьлквейра Аялар хуьдай международный югъ къейдзава. Суварихъ 75 йисан тарих ава. Аялар хуьнин йикъаз талукьарнавай мярекатар Дагъларин уьлкведин меркезда гьар йисуз са шумуд майдандал кьиле тухузва…
Кьилди къачуртIа, цIи шад мярекатар Р. Гьамзатован тIварунихъ галай проспектда «Мир начинается с детства» лишандик кваз аялри чIугунвай шикилрин конкурсдилай башламиш хьана. Гьа са вахтунда М. Горькийдин тIварунихъ галай Урусрин драмтеатрдин вилик квай майдандал концерт кьиле фена. Аялриз, гьакI абурун диде-бубайриз меркездин искусствойрин школайра чирвилер къачузвай аялри халис сувар къурмишна. Махачкъаладин мэр Юсуп Умамова аялрин тIварцIихъ чими келимаяр лагьана.
Украинада кьиле физвай махсус серенжемда иштиракзавайбурун, тIимил агьвал авай, гьакIни чIехи хизанрай тир, бедендин мумкинвилерал сергьят алай, школа-интернатра, яшайишдинни реабилитациядин центрайра авай аялриз С. Меликован тапшуругъдалди суварин юкъуз иллаки артух фикир гун кьетIнавай.
* * *
Аялар хуьдай международный йикъаз ва Дагъустандин халкьдин шаир СтIал Сулейманан 155 йисан юбилейдиз талукьарна, 1-июндиз Махачкъалада, РД-дин образованидин ва илимдин министерстводин ДЮСШ-да, футболдай турнирни кьиле тухвана. Ам кьве паюникай ибарат тир. ИкI, сад лагьай паюна 8-10 ва 11-13 йисарин яшда авай аялрин арада футболдай акъажунар кьиле фена. Кьвед лагьай паюна — Москвадин ва Дагъустандин хкянавай командайрин арада дуствилин къугъун.
Спортдин мярекат ачухуниз талукьарнавай серенжемда Дагъустандин Кьилин советник Зарема Магьмудовади, РД-дин Халкьдин Собранидин депутатар тир Жамалудин Нажмудинова ва Гьажимурад Мегьамедова, Дагъустандин образованидин ва илимдин министерстводин управленидин начальник Лариса Калмыковади, РДЮСШ-дин директор Александр Маркарова ва масабуру иштиракна.
Москвадай атанвай мугьманринни республикадин хкянавай командадин арада дуствилин къугъун иллаки къизгъиндаказ кьиле фена. Ам 5:0 гьисабдалди мугьманрин командадин хийирдиз акьалтIна. РикIел хкиз кIанзава, и командайрин арада «гуьруьш» алатай йисузни кьиле фейиди тир, ам 12-июндиз, Россиядин югъ къейд авуниз, талукьарнавай.
Москвадай атанвай командадин кьилин тренер чи ватанэгьли, вичин ери-бине Мегьарамдхуьруьн райондин Бут-Къазмайрилай тир, яргъал вахтунда Москвада яшамиш жезвай Измир Гьасанов я. Къугъунилай кьулухъ чаз адахъ галаз гуьруьшмиш жедай мумкинвал хьана.
И. Гьасанов 1966-йисуз муаллимдин хизанда дидедиз хьана. 1984-йисуз хайи хуьруьн мектеб акьалтIарна, гъвечIи чIавалай спортдал рикI алай ам ДГПУ-дин физкультурадинни спортдин факультетдиз гьахьна. Спортда, иллаки футболдал къугъунай еке алакьунар авай жегьил 1988-йисуз Махачкъаладин «Динамо», гуьгъуьнлайни «Сокол» командайрик кваз къугъвана. Гележегда ада и рекьяй тренервилин кIвалахдал машгъул хьунин къарар кьабулна. Гьа икI, вуз акьалтIарай 1990-йисуз ам Махачкъаладин А. Маркарован тIварунихъ галай ДЮСШ-да футболдин тренервиле кIвалахал акъвазна.
Гуьгъуьнлай И. Гьасанов Москвадиз акъатна. Ада ана К. Тимирязеван тIварунихъ галай РГАУ-дин (Россиядин государственный аграрный университет) МСХА-дин (Москвадин хуьруьн майишатдин академия) командадин (тIвар РГАУ МСХА) тренервиле кIвалахиз хейлин йисар я. Сифтедай ада, вуздин гадайрин командадин тренер яз, вичин алакьунар къалурна, команда хъсан дережадиз акъудна. Гуьгъуьнлай адан хиве рушарин командадин тренервилин везифаяр туна. И. Гьасанован регьбервилик кваз рушарин командадихъни хъсан нетижаяр ава. Кьилди къачуртIа, алатай йисуз абур Москвадин вузрин арада мини-футболдай 1-лигада чемпионвилин тIварцIиз ва футболдайни кьилин лигада 2-чкадиз лайихлу хьана.
— Гила чаз кьвед лагьай сеферда Дагъустандиз — зи хайи макандиз — командани галаз хкведай мумкинвал хьана. Гьелбетда, зун и кардал пара шад я. И жигьетдай чаз куьмекар гунай заз жуван ва санлай командадин тIварунихъайни чи ватандаш, машгьур меценат Мамед Абасоваз, гьакI РДЮСШ-дин директор Александр Маркароваз сагърай лугьуз кIанзава, — хълагьна ада чи суьгьбетдин эхирдай.
Къуй чи гьар са ватанэгьлидихъ, гьина аваз хьайитIани, агалкьунар хьурай!
Рагнеда Рамалданова
