“Ватандал рикl алайди ва ам хуьз гьазурди” — ихьтин баян ганва “ватанперес” гафуниз чи машгьур ва нуфузлу алим Агьмедулагь Гуьлмегьамедован лезги чlалан баянрин гафарганда. Чахъ халисан ватанпересар тlимил авач. Ахьтин ксар рикlин сидкьидай ийизвай ихтилатрай ва халкьдин къайгъуда аваз чпин экуь ниятар кьилиз акъудун патал ийизвай крарай чир жеда.
Вичин ери-бине Докъузпара райондин Миграгъай (Кьавалар) тир, алай вахтунда чи уьлкведин меркезда яшамиш жезвай Руслан Шемсединович Мегьдиханов ялавлу ватанперес яз гьисабиз жеда. Гьар гатуз гъвечlи ватандиз хтай кьегьалдиз йикъар гьавайда акъуддай мажал жезвач. Ам датlана гьерекатдик ква, са гьихьтин ятlани хъсан, регьимлу кар кьилиз акъудуникай фикирзава ада.
И сефердани ада вич хтайдакай ватанэгьлийриз чирна. Хуьруьн сергьятра ада Усугъчайдихъ фидай рекьел остановка эцигна; инсанриз чIимел йикъара ва я гзаф чимизвайла далдадик акъваздай мумкинвал хьанва. Ихьтин сувабдин крар ийизвай Русланаз вирибуру алхишзава. Хуьруьхъ физвай рекьин участокни ада вичин такьатрихъ тамамвилелди ремонтна, кутугай къайдадиз гъанва. Къени ва умун къилихрин жегьилди вичелай алакьдайвал мергьяматлу крар кьилиз акъудунихъ галаз сад хьиз, дарвиле авайбуруз гъвечlи куьмекарни гузва.
Руслан Мегьдиханов 1983-йисуз Урусатдин Ухта шегьерда дидедиз хьана. 2001-йисуз Дербент шегьердин 15-нумрадин мектеб куьтягьна. 2001-2006-йисара Ухтадин гьукуматдин технический университетда кlелна. Кьилин образование къачур жегьилди 2006-йисалай къениндалди вичин пешедин рекьяй Москвада къецепатан нафтIадин сервисрин тешкилатра кlвалахзава.
Авайвал лагьайтlа, Руслан еке мумкинвилер авай, такьатар гьиниздатlа течизвай кас туш. Ам адетдин къуллугъчи я, амма адан ивидик ватанпересвал ква. Хайи чlалал, эдебиятдал ва тарихдал рикl алай, абур хъсандиз чизвай ва чирвилер мадни артухарзавай инсан я.
Руслан мергьяматлувилин “Леки” фондунин векилрикай сад я. И фонд Руслан хьтин ирид ватанэгьлиди тешкилна. Гьар сада, вичин мумкинвилериз килигна такьатар чара ийиз, тайин са хиляй крар вилик тухузва. Руслан Мегьдиханова этномедениятдинни спортдин рекьяй жавабдарвал вичин хивез къачунва. Ам кьиле аваз ибретлу, ахлакьлу хейлин мультфильмаяр лезги чlалаз таржума авунва. Руслана ихтилатзавайвал, жегьилрин арада хайи чlал машгьур авунин макьсаддалди “Леки” фондуниз гележегда лезги районрин мектебда кlелзавайбурун арада лезги чlаланни эдебиятдин олимпиада тухудай фикирни ава.
Чи гьуьрметлу дустунихъ, лайихлу ватанэгьлидихъ гележегда мадни еке агалкьунар хьурай! Къуй адан берекат артух хьурай ва рикlе авай къени ниятар кьилиз акъатрай! Чlал кlани, халкь кlани ва абурукай фикирзавай ксар чахъ гзаф хьурай. Куьрелди лагьайтlа, — Руслан хьтинбур.
Гьазурайди — Куругъли Ферзалиев
