Газетдин 16-нумрада «Кьилин редактордин гаф» рубрикадик кваз Мегьамед Ибрагьимова Махачкъаладин кьилин майдандал ачухнавай СтIал Сулейманан выставкада художник Муэддин Араби Джемалан айгьамдалди (им зи фикир я) чIугунвай суьретди чка кьунвайдакай ва гьа художникди чIугунвай маса суьретни Тахо-Годидин тIварцIихъ галай милли музейда авайдакай хабар гузва.
Шаир СтIал Сулеймана цIийи девирдиз къуллугъна. ЦIийи девирдини СтIал Сулейманаз 1934-йисуз а девирдин кьилин къиметни гана, амма 1937-йисуз себебсуз дустагънавай Гьажибег Гьажибегов, чIаларай Москвада кIелнавай Дагъустандин сифте алим, дустагъдай ахкъудун патал авур тIалабун чкадин гьакимри кIвачерик вегьена…
Къе, шаирдин 155 йисан юбилейдиз, республикадин кьилин майдандал ачухнавай шикилрин выставкада художник М. Джемала чIугунвай, Тахо-Годидин тIварцIихъ галай милли музейда авай суьретдиз чка гун, хьанвай ягъалмишвал, геж тавуна, туьхкIуьр хъувун лазим я.
Абдулгьашим Гьажимурадов
