Юзан тийидай эменни маса къачудайла, ЕГРН-дин выпискада къалурнавай бязи пунктариз фикир гун чарасуз я. ЕГРН-дай гузвай выписка юзан тийидай эменнидин сагьибдин ихтиярар тестикьарзавай документ я.

Квекай ибарат я ам?

1. Хсусиятчидикай малуматар ва ихтияррин жуьре — са гьи ятIани ватандашдин ва я идарадин кIвачихъ галаз хьун.
2. Ишлемишуниз талукь ихтиярар. Чилин участок гьикI ва вуч патал ишлеми­шиз жедатIа, гьа месэла тайинарнавай малуматар.
3. Участокдин часпарар. «КьетIен лишанар» разделда ихьтин гафар хьун мумкин я: «Чилин участокдин часпарар тайинарнавач». Им акI лагьай чIал я хьи, учас­токдин часпарар тайинарунин серенжем кьилиз акъуднавач. Идахъ галаз алакъалу яз, Росреестрда чилин участокдин час­парриз талукь дуьм-дуьз делилар авач.
4. Къадагъаяр, сергьятар. Ибур жуьре­ба-жуьре месэлайрихъ галаз ала­къалу хьун мумкин я. Месела, залогдихъ, эменнидал къадагъа эцигунихъ ва икI мад. Чир хьун важиблу я хьи, са гьихьтин ятIани къадагъаяр, сергьятар алаз хьайитIа, эменнидиз талукь тир куь ихтиярар ва мумкинвилер хейлин тIимил жеда.

ТIвар кьунвай выписка агьалийривай «Зи Документар» (МФЦ) центрайрай къачуз жеда. Пропискадилай аслу тушиз, и къуллугъ пешекарри 3 йикъан муддатда кьилиз акъудзава.

Загранпаспорт къачуникай

Загранпаспорт  туькIуьрдайла, чи уьл­кведин ватандашриз 2 жуьредикай сад хкядай мумкинвал ава: куьгьне жуьрединди ва я цIийи жуьрединди.

Мукьвал-мукьвал къецепатан уьл­квей­ра сиягьатра жезвайбуруз, яргъал муд­­датда къуватда амукьдай паспорт кIан­­завайбуруз цIийи жуьредин загранпаспорт хкягъун теклифзава. Са гъвечIи муддатда къецепатан уьлквейриз фидай фикир авайбурувай, гьакIни пулунин жигьетдай кьенятвал ийиз кIанзавайбурувай куьгьне жуьредин паспорт хкягъиз жеда.

Загранпаспорт туькIуьрун патал ихьтин документар герек жеда:

 РФ-дин паспорт;

 дидедиз хьайивилин гьакъиндай шагьадатнама (14 йисал кьван яшара авайбуруз талукь я);

 госпошлина. Куьгьне жуьредин заг­ранпаспорт патал 2 агъзур манат гана кIанзава. (14 йис тамам тахьанвай аялриз талукь паспортдай — 1 агъзур манат); цIийи жуьредин загранпаспорт патал 5 агъзур манат гана кIанзава. (14 йис тамам тахьанвай аялриз талукь пас­портдай — 2,5 агъзур манат);

 къуватда амай загранпаспорт (аваз хьайитIа);

 эгер ФИО дегишарнаватIа, гьадан гьакъиндай документ;

 военный билет ва я военный комиссариатдай приписной чар (18 йисалай 27 йисал кьван яшда авайбуруз талукь яз).

 3,5х4,5 сантиметрдин екевал авай пуд шикил.

Гьазур хьанвай загранпаспорт 30 йи­къан (анжах кIвалахзавай йикъар гьисаба кьазва) муддатда вахкуда.

«Лезги газет»