Ватанпересвал

КIварчагъ дередиз шаир Абдул Мутали­бова къуччагърин дере лугьун дуьшуьш­дин кар туш. Гьакъикъатдани, и дере­да авай КIварчагърин, Зизикрин, Нуь­цIуьгърин ва Экенрин хуьрерай машгьур алимар, чIехи дережайрин руководителар, шаирар, манидарар, музыкантар, спортсменар, чилин къадир авай зегьметчияр, са гафуналди, къуччагъар гзаф акъатна, абур гилани ава.

Дяведин махсус серенжемдани КIвар­чагъ дередай гзаф кьегьалри чпин къуччагъвал, ватанпересвал къалурзава. Ахьтинбурукай сад НуьцIуьгърин хуьряй тир Росгвардиядин аскер Нарман Яралиевич Загьиров я. Адакай делилар чаз Нарманан диде, бажарагълу культработник, мегьрибан дишегьли, манидар Мегьамедова Закирата гана. 26 йисуз НуьцIуьгърин хуьруьн культурадин кIвалин директорвиле кIвалахай 2013-йисалай инихъ хуьруьн библиотекадин зеведующий тир З. Мегьамедовади чаз лагьайвал, Нармана виликдай Сирияда махсус серенжемда иштиракна. 2020-йисан 10-ноябрдиз Россиядин Федерациядин оборонадин министрдин приказдин бинедаллаз ефрейтор Загьироваз «Участнику военной операции в Сирии» медаль гана.

Донбассда дяведин серенжем баш­ламиш хьайи сифте йикъарилай эгечIна,   Н. Загьирова СВО-дин зонада къуллугъзава. Алай вахтунда сержант Загьиров автомобилрин ротадин взводдин командирдин заместитель я.

2023-йисан 25-апрелдиз РФ-дин милли гвардиядин Кьиблепатан округдин кьушунрин командованидин приказдалди сержант Нарман Загьироваз «Участнику специальной военной операции» рикIел хуьдай медаль гана.

Кьегьал хцин диде Закират Мегьамедовади чи вилик мад са грамота эцигна. Малум жезвайвал, старший сержант Загьироваз 2024-йисан 22-февралдиз «За усердие в службе, добросовестное выполнение воинского долга и в честь празднования Дня защитника отечества» гафар кхьенвай грамота ганва.

— За квез Нарман жуван хва я лагьана тарифзавач, ам лап къени къилихрин, ахлакь, низам авай халис ватанперес гада я, — ихтилатзава Закират Мегьамедовади. — Махсус серенжемда адал кьве сеферда залан хирер хьана. Госпиталда са­гъар­ хъувурдалай кьулухъ Нарман отпускдиз кIвализни хтана. Вичикай, къуллугъдин везифай­рикай ам рахадач. Вуч хабар­ кьуртIани, гудай жаваб «вири хъсан я, гъалибвал къачурла хкведа чун» я. Чи мурадни гьам я: дяве фад куьтягь хьун, адан иштиракчияр, гъалибвал къачуна, сагъ-са­ла­матдиз кIвалериз хтун.

Хазран  Кьасумов