СтIал Сулейманан райондин кьил Саид Темирханован тапшуругъдалди и йикъара чун — райадминистрациядин ЖКХ-дин ва дуьзмишунин отделдин начальникдин везифаяр тамамарзавай Икрам Нежведилов, информагентстводин кьиле авай Гуллер Камилова ва зун КIварчагъ дередин НуьцIуьгърин хуьруьз фена. Метлеб Донбассда кьиле тухузвай дяведин махсус серенжемда иштиракзавайбурун гьуьрметдай хуьре Баркаллувилин ва дамахдин аллея кутун тир.
— Заз Севастополь шегьерда Ватандин ЧIехи дяведин иштиракчийрин гьуьрметдай Баркаллувилин ва дамахдин аллея туькIуьрнавайди акунай, — суьгьбетзава аллея кутунин тешкилатчи, КIварчагърин хуьруьн депутат Загьидин Тажибова. — Зани фикирна: вучиз ихьтин аллея НуьцIуьгърин хуьре СВО-дин иштиракчийриз жедач кьван? Зи теклифдин тереф райондин кьил Саид Темирханова, райадминистрациядин кьилин заместитель Заур Къагьриманова, КIварчагърин АСП-дин кьил Завидин Загьирбегова, зун председатель тир «НуьцIуьгъар — чи хайи макан» общественный советди хвена.
Чун фейила, 20-25 кас кьван НуьцIуьгърин хуьряй фенвай «Сиртыч-Кварчаг-Куркент» автомобилрин рекьин (анаг хуьруьн кьилин куьчени я) къерехда аллея кутунал машгъул тир. Анал СВО-дин иштиракчияр — орденринни медалрин сагьибар тир Нарман Загьирован, Рагьим Эзберован, Исрафил Исрафилован, Садрудин Хлефован, Рамиз Тажибован, Кемран Мегьамедован, Шайдабег Шабанован портретар (шикилар) ва гъверши тарцин 7 къелем хканвай аллеяда цун патал.
— Гуьрчег акунрин ракьун даяхрал алкIурнавай портретар ва гъверши тарцин къелемар чна, заказ гана, Туладай хкайди я, — давамарна вичин ихтилат Загьидин Тажибова.
Чаз малум хьайивал, аллея кутазвайбурун арада СВО-дин иштиракчийрин дидеярни бубаяр, стхаяр ва маса багърияр, мукьва-кьилияр авай. Аллея кутуниз мерд инсанар тир Нариман Сулейманова, Загьидин Тажибова, Эльмудин Тажибова, Ярали Загьирова, хуьруьн АСП-дин работникри ва чпин тIварар кьуна кIан тахьай масабуру пулунин такьатралди куьмекар гана.
— Са рахунни алачиз, дередин хуьрера тухузвай баркаллу гзаф крарик кьил кутазвай Загьидин Тажибова гъиле кьуна, кьилиз акъудай и кар гьам баркалла къведайди, гьамни сувабдинди я, — лугьузва КIварчагърин АСП-дин кьил Завидин Загьирбегова. — Дередин хуьрерай СВО-да, санлай къачурла, 30-далай виниз кьегьалри иштиракзава. Абурун гьуьрметдай ва Ватан патал телеф хьайибур рикIера хуьнин лишан яз, чахъ Баркаллувилин ва дамахдин аллеяяр КIварчагърин, Зизикрин ва Экенрин хуьрерани кутадай фикир ава. И кардин тереф депутатри, дередин хуьрерин жемятрин векилри хуьзва.
Гьакъикъатдани ватанперес, мугьманперес инсанрин — къуччагърин дере я КIварчагърин дере. Аферин ва баркалла!
Хазран Кьасумов
