Чи ватанэгьлияр — гьар сана

Духтур! Ам гьар са инсанди вичин уьмуьр ихтибарзавай кас я. Ругуд йисуз кIелна, мединститут куьтягьзавай гьар са студентди вичин пешекарвилин везифаяр намуслудаказ, къуватар гьайиф татана, кьилиз акъудда лагьана Гиппо­к­ратан кьин кьазва. Амма халисан духтурар чпин пешедал рикI алай, сифте чкадал  инсанрин сагъламвал эцигнавай, а патал алай касдин гьалдикай хабар кьадай ва маса хъсан ерияр хас тир пешекаррикай жезва.

Вири хилера хьиз, медицинадани­ лайихлу гел тунвай ксар къурушвийрин арада тIимил авач. Чпин тIварар неинки республикада, гьакI къецепатани кваз машгьур хьанвай Решид Гьажиеван, Нариман Рамазанован, Решид Къачаеван, Микьсад Везирован гьакъисагъвилин зегьметар ватанэгьлийрин рикIел алама. Зи ихтилат алай вахтунда Моск­вада яшамиш жезвай, духтурвилин пешедалди вичин тIварцIел халкьдин патай баркалла гъанвай лайихлу къурушвийрикай сад тир, медицинадин илимрин ­кандидатвилин тIвар къачунвай Вер­диханов Нажибула Исмаиловичикай физва.

Гьеле Хасавюрт райондин Къуруш­рин хуьруьн Якьуб Аскандарован тIвар­цIихъ галай мектебда кIелдай йисара Нажибулади республикада кьиле тухузвай олимпиадайра иштиракдай ва гьамиша кIвенкIвечи чкаярни кьадай. Вири предметрай вадар аваз кIелай Нажибулади мектеб къизилдин медалдалди акьалтIарна.

Чирвилерин мягькем бине авай жегьилдин вилик уьлкведин са шумуд вуздин ракIарар ачух тир. Амма вичин рикI алай пеше ада гьеле мектебда амаз хкянавай: инсанрин сагъламвилин къаравулда акъвазун. Ихьтин къаст авай жегьил­дикай Москвада Н. И. Пирогован тIвар­цIихъ галай Россиядин ахтармишунардай милли медуниверситетдин студент хьана. Гьанани Нажибуладин чирвилерални алакьунрал тарс гузвай муаллимарни, студентарни тажуб тир.

Терапиядин ва хирургиядин хилерай хейлин конференцийрин иштиракчи Н.Вердиханов 2015-2016-кIелунин йисуз кьиле тухвай илимдин фестивалдин ва 2016-2017-йисара студентринни жегьил алимрин международный Пиро­говский конференциядин оргкомитетдин член хьана.

Нажибулади гьеле вад лагьай курсуна кIелзавай йисара хирургиядин техникадай вичин чирвилер артухарун патал, Склифосовскийдин тIварцIихъ галай тади куьмекдин институтда дежурствоярни тухуз хьана. Университетни агалкьунралди акьалтIарай Нажибула аспирантурадик экечIна, 2020-2023-йисара кIелна ва диссертациядин винел кIвалахна. Гьа икI, алай йисан майдин вацра Вердиханов Нажибула Исмаиловича «Анализ результатов хирургического лечения каротидных параганглиом» темадай медицинадин илимрин доктор Чулин Андрей Валерьевичан гуьзчивилик кваз диссертация хвена ва адакай медицинадин илимрин кандидат хьана.

Чна, Къурушрин вири жемятди, Нажибула Исмаиловичаз и кар мубаракзава, чаз ам мадни еке дережайрив агакьна кIанзава.

Вердиханов Нажибула 1996-йисан 4-апрелдиз дидедиз хьана. Адан буба Исмаил Шагьназарович хуьруьн участковый больницадин терапевт, диде ­Динара Агъарагьимовна хуьруьн мектебда муаллим я. Аферин Нажибула  хьтин веледар тербияламишзавай диде-бубайриз!

Гьажи  Къазиев