И мукьварал Хасавюрт райондин Къурушрин хуьруьн Айдун Айдунован ва Якьуб Аскандарован тIварарихъ галай 1 ва 2-нумрайрин юкьван мектебра вири вадар аваз кIелзавай ва вири мярекатра хушвилелди иштиракзавай аялриз пулдин премияр гунин шад мярекат кьиле тухвана. Аниз хуьруьн агъсакъалриз, администрациядин кьилиз, Хасавюрт райондин образованидин управленидин начальникдин заместитель Айвар Мамедоваз ва маса юлдашриз тек­лифнавай.

Мярекат 1-нумрадин юкьван мектебдин директордин тербиядин рекьяй замес­титель Рубабе Лукьмановна Акбаровади ачухна ва сифте гаф директор, Ислам Надирович Гьажиметоваз гана.

— И мярекат тешкилайди, Дагъустандин об­разованидинни илимдин министрдихъ га­лаз алакъалу хьайиди «Гаджиметов ъ и закон ъ» ООО-дин генеральный директор  полковник Гьажиметов Жумарт Демирович я, — танишарна Ислам Надировича. И мярекат кьиле тухун патал ада Къурушдал вичин имидин хва, генеральный директордин заместитель, Военный прокуратурадин ветеранрин органрин Обществодин  председатель, РФ-дин журналистрин Союздин член, запасда авай юстициядин полковник Гьажиметов Натиф Надирович рекье хтунвай.

Натиф Надировича вичин рахунра аялриз агалкьунар мубаракна ва лап хъсандиз кIелзавайбуруз пулдин премияр, министрдин къулар алай грамотаяр ва чухсагъулдин чарар гана. Ингье абур: Эмирова Камила – 11 кл. (25000), Къулиев Иса — 9 кл. (15000), Мамедова Милана — 4 кл. (5000) -1-мектеб;  Жаруллаева Изабелла — 11 кл. (25000), Гьамзаева Назани — 9 кл. (15000), Азадов Фарид — 4 кл. (5000) — 2-мектеб.

Эхирдай мярекатдал рахай мектебрин директорар Ислам Гьажиметова ва Саида Юсуповади мергьяматлувилин мярекатдин тешкилатчийриз — полковникар тир Жумарт ва Натиф Гьажиметовриз чухсагъул лагьана ва мадни агалкьунар хьун алхишна.

Гьажи Къазиев