Дагъларин уьлкведин меркездин агьалийриз Каспий гьуьлуьн къерехда, Къумукьринни Аваррин театррин дараматрин арада авай парк пуд тIвар алаз чизвай: «Шегьердин багъ», «Родопдин бульвар» ва «СтIал Сулейманан сквер». Дагъустан Республикадин Кьил Сергей Меликован теклифдалди ва шегьердин администрациядин къарардалди инсанри рикI алаз ял язавай и майдандиз гила СтIал Сулейманан тIварунихъ галай парк лугьузва. Халкьдин шаирдин 155 йисан юбилейдихъ галаз алакъалу яз парк цIийикIа туькIуьр хъувунва. Эцигунрин кIвалахрин сад лагьай пай акьалтIарнава.
«Лезги газетдин» редакция Пушкинан тIварунихъ галай куьчеда амайла, чун гьар юкъуз Сулейман бубадин скверда къекъведай, гьуьлелай къвезвай таза шагьвардикай лезет хкуддай. Шаирдин памятникдин вилик мукьвал-мукьвал яратмишзавай дустарни кIватI жедай. Бульвар, сквер фадлай чизвай чкаяр тиртIани, и йикъара акурла, а чкаяр саки чир хъжедайвал амач. Гьи патахъ килигайтIани, дегишвилер аквазва. Кьилинди — хъсан патахъ.
Лугьун лазим я хьи, парк цIийикIа туькIуьр хъувуниз талукь такьатар мергьяматлувилин «Умуддин къубба» фондуни чара авуна. Санлай къачурла, — 357 млн манат.
Махачкъаладин администрациядин кьилин заместитель Нариман Темуркаева суьгьбет авурвал, вири кIвалахар 18-майдалди куьтягьун патал устIаррин, фялейрин 11 бригада (130 кас) кардик кутунвай. Абуру чпин хиве авай везифаяр тирвал тамамарнава.
Сифте нубатда виле акьазвайвал, куьгьне, китIизвай тарар атIанва, абурун чкадал 300-дав агакьна цIийи къелемар хцанва. Цуьквер цазвай чкаярни гзафарнава. Санлай къачурла, 200 агъзурдалай виниз цуьквери шегьерэгьлийрин, мугьманрин гьевес хкажзава.
Гипсдин паруяр мармардинбуралди эвезнава. Цин турбаяр дегишарнава. Электроэнергиядин симер, шнурар аквазмач. Абурун чкадал чилин кIаникай кабелар тухванва. Инсанар къекъведай тротуарра цIийи плиткаяр тунва. ЦIийи фонтанди вичин къвалав датIана инсанар кIватIзава. Парк тирвал эцигнавай цIийи куьсруьярни ацукьиз къулайбур я. Муькъуьн кIаникай гьуьлуьн къерехдал фидай чка (переход) гегьеншарнава, аниз бетон цанва.
Пушкинан куьчеда инсанар къекъвезвай тротуардин гьяркьуьвал 2,5 мертдилай 5,05 метрдал кьван гегьеншарнава. Ина верхьи тарарин аллеяни кутунва. Къацу зонаяр вири хвенва ва авайдалай артухарнава. Паркунин вири майданда гъверши, верхьи, къавахдин, туйдин, рододендрондин къелемар цанва. Газонар, клумбар мадни гуьрчегарнава.
Паркуниз къвезвай агьалийри устIаррин кIвалахдиз ва цIийикIа туькIуьр хъувунвай паркдиз хъсан къимет гузва. Анаг, дугъриданни, чи инсанри ва мугьманри культурнидаказ ял ядай, шадлу мярекатар кьиле тухудай, гьуьлуьн гьавадикай, жуьреба-жуьре цуькверикай лезет хкуддай майдандиз элкъведа.
Чи мухбир
