И йикъара Докъузпара райондиз Дагъустан Республикадин гьукуматдин хаммал, тадаракар къачудай Комитетдин председателдин сад лагьай заместитель Абдулкерим Абдуллаев мугьман хьанвай.

Мярекатрин сергьятра аваз винидихъ къейднавай комитетдин векилди Докъузпара райондин агьалийрикай 10 кас кьабулна, абурухъ галаз ачух рахунар авуна. Кьилди къачуртIа, Мискискарин хуьряй тир Адил Шагьвердиева райондин вири хуьрер газдалди таъминарунин патахъай месэла гъана. Къейд тавуна жедач, алай вахтунда тIебии газдикай анжах Усугъчай ва ЦIийи Кара-куьре хуьрерин агьалийри хийир къачузва. Усугъчай хуьруьн Кьил Фаргьат Мисриханов, хуьруьн агьалийрин истемишун яз, райцентрдиз цIийи хъвадай цин линия гъунин месэладай рахана. Гьа и хуьряй тир Ренат Агъаметова МФЦ-дихъ хсуси дарамат авачирдакай хабар гана. Мискискарин хуьруьн Кьил Шафидин Магьарамова РД-дин Госкомитетдин векилдиз хуьрурьн агьалийрик къалабулух кутазвай месэлайрикай лагьана. Кьилди къачуртIа, ада аялрин бахча авай гьал чешнедиз гъана. Агъашериф Агъаширинова Усугъчайдин СОШ авай гьалдикай къейдер гана. Гъвейибег Шагьвеледовани мектебар ва аялрин бахчаяр авай гьалдикай къиметлу хабарар гана. Салар дегидай целди таъминарунин рекьяй амукьзавай месэлайрикай Г.Парванаева ва А.Къарибова рикIел гъана. «Къуруш-Мискинджа» къаналдин винел ремонтдин кIвалахар тухвана кIанзавайди, Къалажухдин къанал гъана куьтягьна кIанзавайдан гьакъиндай Гуьлмегьамед Парванаева лагьана. Ада чилер дегидай сетдин управление кьве райондинди хьуниз килигна (Ахцегь, Докъузпара) чи чкадин шартIара гьалтзавай татугайвилерикайни къейдна. Марат Крымова чи районда МВД — дин отдел кардик кухтуникай лагьана. Шагьлар Бухсаева 2015-йисалай эцигунрин кIвалахар акъваз хьанвай ЦРБ-дин цIийи корпусдикай малумат гана. Шамиль Магьмудова райондин сергьятрай фенвай рекьерин рази тежедай гьалдикай лагьана. Абдулкерим Абдуллаева вичихъ галаз гуьруьшмиш хьайи, авай месэлайрикай ачухдиз баянар гайи ксариз сагърай лагьана, вич а месэлаяр гьялунин кардик шерик жеда лагьана хиве кьуна.

«Лезги газет»