Дагъустандин здравоохраненидин министерстводин пресс-къуллугъди хабар гузвайвал, кьетIен кьезилвилер авай категориядин агьалийрив (льготникар) мукьвара дарманар агакьун гуьзетзава.
РикIел хкин: 2024-йисан эвел кьилера дарманар маса къачунин жигьетдай цIийи къайдаяр къуватда гьатна. Абурал асаслу яз, кьезилвилер авай агьалияр патал дарманар къачунин месэладай Дагъустандин здравоохраненидин министерстводи, федеральный казначействодин РД-да авай Управлениди ва РД-дин госзакупкайрин рекьяй Комитетди арада алакъа аваз кIвалахунин цIийи механизм арадал гъун лазим атана. ЦIийи закондалди Минздравдивай масакIа дарманар къачуз жезвачир. Январдин вацра и механизм арадал гъана. Идалай кьулухъ министерство пландик квайвал дарманар маса къачунин (закупкайрин) месэладив эгечIна. Амма…
ЦIийи законодательстводал асаслу яз, дарманар маса къачуникай министерство 3 ва бязи вахтара 4 сеферда малумаруниз мажбур хьана. ИкI, абур (дарманар) маса къачун патал тайинарнавай сифтегьан къимет тIимил яз акурла, поставщикар яргъалди савдадиз экъечIзавач.
Финансламишун тIимиларунихъ галаз алакъалу яз, гьеле 2023-йисуз Дагъустандин здравоохраненидин министерстводи 600 миллион манатдин кьадарда аваз, яни льготникриз 2024-йисан эвелра лазим къвезвай кьадар дарманар маса къачун патал алава финансар чара авун тIалабнай. Алава финансар агакь тавурвиляй дарманар маса къачунин месэла яргъал аватна. Гьа са вахтунда авай запасарни 2023-йисан эхирдалди вири ишлемишнавай.
Гьар гьикI ятIани, къенин юкъуз дарманар маса къачунин месэла гьялиз алакьнава. Лазим вири серенжемар кьабулнава. Кьезилвилер аваз дарманар къачузвай агьалийривай, чеб яшамиш жезвай чкайрин поликлиникайрай рецептар къачуна, аптекайриз физ жеда.
Гьа са вахтунда са кар мадни къейд ийиз кIанзава: къенин юкъуз республикада кьезилвилер аваз дарманар къачузвай категориядин агьалияр тамамвилелди таъминарун патал 2 миллиард манатдилай артух алава такьатар лазим къвезва.
Чи республикада дарманрин месэладиз кьецI гузвай кьилин себебдик гзафбуру, дарманрикай отказна, пул къачун акатзава. Ида лагьайтIа, федеральный бюджетдай чара ийизвай пулунин такьатар тIимиларунал гъизва. И себебдалди дарманралди (гьа гьисабдай яз багьабуралдини) таъминарунин месэла республикадин бюджетдай кьилиз акъудун лазим къвезва.
Рагнеда Рамалданова
