1,8 миллиард ­манат къачуда

Дагъустандиз зирзибил гьялдай ва абур чара ийидай (сортировка) карханаяр эцигун патал 1,8 миллиард манат чара ийи­да. Идакай «Дагъустандин экономика» те­леграм-каналди хабар гузва.

Кьилди къачуртIа, чешмеди къейдзавайвал, Россиядин эколо­гиядин операторди Кеферпатан­ Кавказдин республикада ТКО (твердые коммунальные отходы)­ гьялунал машгъул жедай кьве кар­хана арадал гъун патал 1,85 миллиард манат пул харж авун фикирда кьунва.

ЦIийи карханаяр Дербент ва Хасавюрт районра эцигда. Чешмедин делилралди, Дербент районда эцигзавай карханадихъ 120 агъзур тонн, Хасавюрт районда пайда жедай карханадихъ 150 агъзур тонн зирзибил гьялдай гужлувал жеда.

Чешмеди мадни хабар гузвайвал, зирзибилдал машгъул жедай и карханайрин къурулушдик кваз алай йисан эхирдалди ТКО гьялдай ва утилизация ийидай махсус объектарни хкажда. Гьа са вахтунда зирзибил чара ийидай (сортировка) комплекс­рин гужлувал йиса 200 ва 250 агъзур тонн  жеда.

6 улакь чара ийида

2024-йисуз Дагъустанда тIи­мил къазанжи къвезвай, гзаф аялар авай хизанриз 6 микроавтобус чара ийида. Идакай РД-дин зегьметдин ва яшайишдин рекьяй вилик финин министерстводин пресс-къуллугъди хабар гузва.

Къейдзавайвал, и микроавтобусар къачудай арза гьазурун патал герек тир документрин сиягь тайинарнава. (Къейд ийин хьи, ула­кьар къачунин шартIарикай тамам баянар зегьметдин ва яшайишдин рекьяй вилик финин министерстводин сайтдай ва официальный маса чешмейрай чириз жеда).

Пресс-къуллугъдин делилралди, чпе 10-далай тIимил ва 15-далай артух тушиз ацукьдай чкаяр авай «Газель» маркадин улакьар 2022-йисалай инихъ 12 хизандиз ганва. Кьилди къачуртIа, 2022-йисуз микроавтобусар тIимил къазанжи къвезвай 6 хизандив агакьнай, гьа и кьадарда аваз алатай йисузни чара авунай.

Хизанриз улакьар гуниз талукь серенжемар кьилиз акъудун патал алай йисуз пулдин такьатар республикадин бюджетдай чара авунва.

Багьа хьанва

2024-йисан сад лагьай кварталдин нетижайралди, уьлкведин гзаф регионра кьилдин (частный) кIвалерин къиметар багьа хьанва. Идакай «Дагъустандин экономика» телеграм-каналди хабар гузва.

Чешмеди къейдзавайвал, ихьтин кIва­ле­рин къиметар виридалайни гзаф Дагъус­танда, Алтай Республикада, Чувашияда хкаж хьанва. ИкI, 2023-йисан сифтегьан квар­талдив гекъигайла, чи республикада кьилдин кIвалерин къимет 35,2 процентдин багьа хьанва.

Апрелдин вацран рекъемралди, Да­гъус­­танда кьилин кIвалин къимет, юкьван гьисабдалди, 14,2 миллион манатдиз барабар хьана. Чешмеди, «МирКвартир» порталдин аналитикадин ахтармишунрин нетижайрал асаслу яз къейдзавайвал, Чечняда и рекъем 12,4 миллион манатдиз, Ставрополдин крайда 8,5 миллион манатдиз барабар я.

Юкьван гьисабдалди, Дагъустанда цIийиз эцигнавай яшайишдин кIвалин 1 квадратдин метр алай вахтунда саки 82 агъзур манатдиз барабар я. Гъиляй вахчузвай кIвалин (вторичный рынок) квадратдин метрдин къимет лагьайтIа, тахминан 90 агъзур манатдикай ибарат я.

Гьазурайди — Муса  Агьмедов