14-майдиз Махачкъалада РД-дин Кьил Сергей Меликован регьбервилик кваз кьиле фейи совещанидал Дагъустанда ЧIехи Гъалибвилин сувариз талукьарна кьиле тухвай мярекатрин нетижаяр кьуна, яшайишдин хилез хас са жерге месэлаяр веревирдна.
Гъалибвилин суварин мярекатрин нетижайрикай РД-дин Кьилин ва Гьукуматдин Администрациядин Руководитель Алексей Гьасанова лагьайвал, республикада 9-Майдиз талукьарнавай 800-лай виниз мярекатар кьиле фена ва анра, санлай къачурла, 500 агъзурдалай виниз инсанри иштиракна. Виридалайни гурлудаказ кьиле фейи мярекатрин арада «Гъалибвилин тIаратI», «РикIел хуьнин вахта», «Гъалибвилин диктант», «Жуьрэтлувилин тарсар» ва маса серенжемар авай.
Сергей Меликова мярекатар чешнелудаказ кьиле тухуник пай кутур виридаз сагърай лагьана ва къведай йисуз ЧIехи Гъалибвилин 80 йис тамам жезвайди, и вакъиадиз мадни хъсандиз гьазур хьун герек тирди къейдна.
Гуьгъуьнлай совещанидин иштиракчийри Буйнакскдин райондин Чиркей хуьруьн агьалияр хъвадай целди таъминарунин месэла веревирдна. РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Салам Гьасайниева хабар гайивал, Чиркейда насосрин станция цIийикIа туькIуьр хъувуниз республикадин бюджетдай 90 миллиондилай виниз такьатар чара авунва.
Гуьгъуьнлай рахай РД-дин Гьукуматдин Председателдин Сад лагьай заместитель Руслан Алиева къейд авурвал, республикада гьукумдин органра кIвалахзавайбурал алай налогрин буржар агалунин кIвалах кьиле физва. Алай вахтунда Счетный палатадин, са жерге министерствойрин ва балугърин майишатрин Комитетдин къуллугъчийри чпел алай налогрин буржар тамамдиз вахканва.
И месэладай вичин фикирар лугьудайла, С.Меликова хабар гайивал, алай йисан 1-кварталда республикадин бюджетдиз налогрин гьисабдай 700 миллион манат пул атанва. Алатай йисан и девирдив гекъигайтIа, и рекъем 25 процентдин артух хьанва.
Совещанидал гьакIни Махачкъала шегьердин агьалияр дурумлудаказ электроэнергиядалди таъминарунин месэла, республикадин шегьерра цин къурулушар цIийикIа туькIуьр хъувунин жигьетдай Сад тир операторди кьабулзавай серенжемар веревирдна. Гегьеншдиз РД-дин Кьилин сайтдай кIелиз жеда.
Агьмед Магьмудов
