«Дагестанская правда» газетдин редакцияда СтIал Сулейманан райондин кьил

С. М. Темирханован пресс-конференция хьана

СтIал Сулейманан 155 йисахъ галаз санал адан тIвар алай райондин 95 йисни жезва. Шаирдин юбилей тухунин­ прог­рамма гьихьтинди я, ам гьикI ва ни тамамарзава? СтIал Сулейманан район республикада яшайишдин ва экономи­ка­дин рекьерай вилик квайбурукай сад я, адан агалкьунриз куь ва ни къуват гузва? Гьихьтин агалкьунар хьайитIани, гьялна кIанзавай ва цIийиз арадал къвезвай месэлаярни­ ава, абур гьикI гьялзава? Мукьвал гележегда гьихьтин цIийивилер вилив хуьзва? Юбилейриз талукь яз Саид Темирханова тамам суьгьбет авуна, журналистрин суалриз жавабар гана.

Пресс-конференциядин сергьятра аваз, С.Темирханов чIе­хи шаирдин юбилейдиз талукь са шумуд чIехи кIвалахдал кьилди акъвазна. ИкI, республикадин Гьукуматдин къарардалди, СтIал Сулейманан тIварунихъ галай государстводин премия тайинарда (арадал хкида лагьайтIа, дуьз я: советрин девирда рес­публикадин ихьтин премия, виридалайни чIехиди яз, авайди тир). И премия Дагъустандин милли чIаларал акъатдай литера­ту­радин виридалайни хъсан эсеррай гуда. Республикадин куль­ту­радин министерстводин къаюмвилик кваз, лезги ва урус чIа­ла­рал шаирдин хкягъай кьве том эсерар акъатда. Лезги театрди­ СтIал Сулеймана вичин гада Мусаибахъ галаз теснифай «СтIал Саяд» драма, сегьнеламишна, тамашачийриз къалурда­. Юбилейдиз илимдинни тежрибадин са шумуд конференцияни та­лу­­кьарнава­. 17-майдиз (нянин сятдин 5-даз) Махачкъалада, М. Горь­кийдин тIварунихъ галай урус драмтеатрда, республикадин руководстводин ва яратмишзавай интеллигенциядин иштираквал аваз чIехи межлис кьиле фида.

СтIал Сулейманан райондани, гьелбетда, шаирдин юби­лей­­диз кьетIен фикир гузва. Юбилейдин мярекатрин — фестивалрин, конференцийрин, гьар жуьре конкурсрин — кьадар гзаф я. Кьилди къачуртIа, районда гьар йисуз февралдин вацра тухузвай Хайи чIалан йикъан илимдинни тежрибадин конференция и сеферда СтIал Сулейманаз бахшнавай ва ам гегьеншдиз кьиле фена. И йикъара Кьасумхуьрел райондин культурадин отделди тешкилдай, яратмишзавай ва илимдин интеллигенциядихъ галаз санал республикадин Халкьдин Собранидин векилрини иштиракдай «Элкъвей столни» тухуда. Райондин администрацияди, меценатрин куьмекни галаз, СтIал Сулейманаз бахшнавай пуд ктаб акъудзава, адакай телефильмни гьазурзава.

Шаирдин юбилейдиз талукь малуматар гайидалай кьулухъ С. Темирханов район вичин юбилейдин йисуз яшайишдин ва экономикадин рекьерай агакьнавай нетижайрал акъвазна.

СтIал Сулейманан районди гьам Россиядин Федерация­дин, гьамни реcпубликадин государстводин вири программайра активнидаказ иштиракзава. Кардик квай чIехи карханайрилай гъейри (абурукай яз виридаз чизвай Ричал-цин завод), къенин юкъуз­ гьатта вири Россиядин Федерацияда чIехибурукай яз гьисабиз жедай кьве проектдал кIвалахзава: цIийи къайдадин багълар кутазвай ва 50 агъзур тонн емишар хуьдай чка (гьамбархана) эцигзавай «Паласа» ва як, нек гьасилдай «Алияк» майишатар къуватда гьатзава. Районда шуьмягърин Россияда виридалайни чIехи багъ кутунва. Гъилевай йисуз поли­мердин турбаяр акъуддай заводни эцигна куьтягьда. Гьам майи­шатрин, гьам агьалийрин цихъ игьтияжни къвердавай артух жезва. И месэла районда магистральный водовод эцигуналди гьялзава. Ам цIинин йисуз кардик акатда, ада 40 агъзур агьали хъвадай целди таъминарда.

— Виридаз чизвайвал, СтIал Сулейман хайи югъ гьар йисан 18-майдиз республикадин меркезда, адан тIвар алай паркуна ва чи районда шииратдин сувар хьиз къейдзава, — лагьана С. Те­­­мирханова. — Им Дагъустандин чIехи шаир Расул Гьамзатова­ кутур адет я. И сеферда шаирдин ватанда  суварин шадвилер иллаки гурлубур хьун гуьзлемишзава. Виринрай къведай мугьманрин — яратмишзавай ва илимдин интеллигенциядин, общественностдин, гьар жуьре дережайрин властдин векилрин кьадарни чIехиди жеда. Мугьманар лайихлудаказ кьабулиз чун гьазур я. И югъ абурун рикIел аламукьдайди жедайдални чна шак гъизвач, — алава хъувуна райондин кьили.

А.Омаров