И мукьвара СтIал Сулейманан райондин Вини СтIалрин юкьван мектебда, «Илимдиз кам» лишандик кваз, школайра 5-11-классра кIелзавай аялрин арада математикадай гьар йисуз кьиле тухузвай олимпиада кьиле фена.
Макьсад школайра кIелзавай аялрин чирвилерин ери ахтармишун, математикадин илимдиз аялрин патай итиж артухарун, математикадал рикI алай аялар майдандиз акъудун, абур руьгьламишун, бажарагълубур жагъурун (ва икI мад) тир и серенжемди гила 17-сеферда аялриз чпин алакьунар къалурдай мумкинвал гана. Виликан йисара хьиз, цIини ам меценат, технический илимрин доктор, профессор, Москвадин М.В. Ломоносован тIварунихъ галай госуниверситетдин механико-математикадин факультет акьалтIарнавай Абдул Баламирзоеван регьбервилик кваз, хъсан тешкилувал аваз, кьиле фена.
Олимпиада тешкилунин кIвалахда куьмекар гайибурун арада Москвадин М. В. Ломоносован тIварунихъ галай госуниверситет акьалтIарнавай Гьабибула Гьабибулаев, ДГПУ-дин информатикадин кафедрадин доцент Селимхан Агъаханов, ДГУ-дин доцентар Максим Ризаев ва Ветлугин Бейбалаев, МАДИ-дин Махачкъаладин филиалдин доцент Даниял Селимханов авай.
Абдул Баламирзоевахъ галаз кьиле фейи суьгьбетдай малум хьайивал, цIи олимпиадада СтIал Сулейманан, Ахцегь, Мегьарамдхуьруьн, Табасаран, Хив, Дербент районрай ва Дербент, Дагогни, Каспийск ва Махачкъала шегьеррай тир 283 аялди иштиракна. Олимпиададин спонсорар мергьяматлувилин «Умуд» фонд, «Надежда» ЦОД, меценатар Н. Н. Бутаев ва Ш. Н. Назаралиева тир. Олимпиада тешкилунин ва кьиле тухунин кIвалахда СтIал Сулейманан райондин администрацияди, РУО-ди ва Вини СтIалрин юкьван мектебдин коллективди (директор — Расул Къагьриманов) еке куьмекар гана.
Олимпиада ачухуниз талукьарнавай мярекатда СтIал Сулейманан райондин образованидин управленидин начальник Гьуьсейн Шихбабаева ва РУО-дин патай жавабдар къуллугъчи Азим Азимова иштиракна. ЦIи олимпиадада Дербент, Каспийск, Махачкъала шегьеррай, Дербент, Ахцегь, Мегьарамдхуьруьн ва СтIал Сулейманан районрай тир аялар гъалиб хьана. Абурукай 1-чкайриз, 3 000 манатдин кьадарда аваз пулдин пишкешдиз ва I дережадин дипломриз 21 аял лайихлу хьана. 12 аялди — 2 ва 23 аялди 3-чкаяр кьуна. Абуруз, талукь тирвал, 2000 ва 1500 манат пул ва дипломар гана. Мадни 38 аял грамотаяр, са агъзур манатдин кьадарда аваз пулдин пишкеш гуналди къейдна.
Рагнеда Рамалданова
