Эхиримжи йисара СтIал Сулейманан районда, ЧIехи гъалибвилин сувариз талукьарна машинар цIиргъина аваз финин (автопробег) мярекат тешкилун хъсан адетдиз элкъвенва. Адак кьил кутунвайди райадминистрациядин спортдин, туризмдин ва жегьилрин крарин рекьяй комитет я.
Райадминистрациядин пресс-къуллугъдин малуматдалди, са шумуд югъ идалай вилик кьиле фейи и серенжемда райондин зегьметчи коллективрин ва общественный тешкилатрин векилрин, гьакIни жергедин агьалийрин машинрин цIиргъинин рехъ «Вечный огонь» мемориалдилай башламиш хьана. Автопробегдин иштиракчийри мемориалдал цуьквер эцигна. Са декьикьада кисна акъвазуналди, дяведа телеф хьайибурун экуь къаматар рикIел хкана. Анлай гъалибвилин яржар алай машинри райцентрадихъ рехъ давамарна. Абур районэгьлийри шаддиз къаршиламишзавай.
Райадминистрациядин дараматдин вилик машинрин цIиргъинин иштиракчияр райондин кьил Саид Темирханова ва маса къуллугъчийри къаршиламишна. Райондин регьберди автопробегдин иштиракчийриз Ватандин ЧIехи дяведа советрин халкьди къалурай игитвал рикIера хуьник пай кутунай, идалди акьалтзавай несилдиз хъсан чешне къалурунай сагърай лагьана.
ЦIиргъина аваз физвай машинрин рехъ Цмурдал акьалтIна. Ватандин ЧIехи дяведин иштиракчи, генерал-майор Мегьамед-Гьанифа Шайдаеван экуь къаматдиз бахшна, ана волейболдай районрин арада ачух турнир кьиле физвай.
***
Райадминистрациядин спортдин, туризмдин ва жегьилрин крарин рекьяй комитетди, А.Бабаеван тIварунихъ галай 1-нумрадин ДЮСШ-дин иштираквални аваз, волейболдай гьар йисуз Цмуррин кIелунинни спортдин центрада кьиле тухузвай турнир ачухдалди вилик райондин регьбер Саид Темирханова, адан сад лагьай заместитель Лацис Оружева, Цмуррин хуьруьн кьил Раида Алибеговади машгьур военачальникдин памятникдал ва Ватандин ЧIехи дяведа чанар гайи ксариз хкажнавай монументдал цуьквер эцигна.
С. Темирханова виридаз ЧIехи Гъалибвилин югъ тебрикна. Ада Цмур игитралди машгьур чка тирди, генерал-майор М.-Гь. Шайдаева абурун арада кьетIен чка кьазвайди, акьалтзавай несилдиз ватанпересвилин тербия гунал гьалтайла, ихьтин серенжемрихъ еке важиблувал авайди къейдна. Шайдаеврин хизандиз ада сагърай лагьана, абуру хайи хуьруьн абадвал патал еке зегьмет чIугвазвайди къейдна.
Райондин регьберди алай вахтунда Украинада кьиле физвай дяведин махсус серенжемдин иштиракчийрихъ элкъвена, чими келимаяр лагьана. Ата-бубайрин рехъ, Ватандин вилик пак буржи абуру намуслудаказ кьилиз акъудзавайдакай лагьана.
Къизгъиндаказ кьиле фейи къугъунрин нетижада Курхуьруьн — 1, Агъа СтIалрин — 2 ва А.Бабаеван тIварунихъ галай 1-нумрадин ДЮСШ-дин командайри 3-чкаяр кьуна.
Рагнеда Рамалданова
