И йикъара КIварчагърин хуьре Дагъустандин Кьил Сергей Меликован теклифдалди, СтIал Сулейман дидедиз хьайидалай инихъ 155 йис тамам хьун къейд авунин сергьятра аваз, футболдин зурба фестиваль кьиле тухвана. Аниз атанвай гьуьрметлу мугьманрин арада РД-дин Гьукуматдин Председателдин заместитель Нариман Абдулмуталибов, Халкьдин Собранидин Председателдин заместитель Камил Давдиев, илимдин ва образованидин министр Ягья Бучаев, физкультурадин ва спортдин министрдин заместитель Будун Будунов, «Магнит» компаниядин гендиректор Анна Мелешина, «Махачкъала-Динамо» футболдин клубдин векилар ва масабур авай. Идакай чаз райадминистрациядин пресс-къуллугъди хабар гана.
Фестиваль ачухуниз талукьарнавай шад мярекатдал СтIал Сулейманан райондин кьил Саид Темирханова, мугьманриз хвашкалди лугьуналди, спортдин серенжемдин иштиракчийрихъ агалкьунар хьун алхишуналди, районда алай йисуз футболдин школайрин лигада умуми образованидин 5 идарадин командайри иштиракайди къейдна. Ам жаван футболистрал гьалтзавай четинвилерикайни рахана. Кьилди къачуртIа, къенин юкъуз абуруз ерилу гьазурлухвал лазим тирдал фикир желбна. И макьсаддалди райондин школайрин алатринни техникадин база мягькемарзава, лазим шартIар арадал гъизва. «Школада футбол» проект агалкьунралди уьмуьрдиз кечирмишун патал тежрибалу тренерар-муаллимар желбнава. Образованидин са жерге идарайра, гьа гьисабдай яз КIварчагърин школадани, спортдин кьилдин секцияр ачухда. И месэлайра еке куьмекар гунай райондин регьберди Дагъустандин Кьил Сергей Меликоваз ва «Динамо-Махачкъала» футболдин клубдин академиядиз сагърай лагьана.
Саид Темирханова райондин уьмуьрдин жуьреба-жуьре хилера хъсан адетдиз элкъвенвай гьукуматдинни кьилдин ксарин амадагвилин тежрибадин ва меценатвилин важиблувални къейдна. ИкI, меценатрин иштираквал аваз, районда госпрограммаяр ва яшайишдин проектар уьмуьрдиз кечирмишнава, яшайишдин метлеб авай хейлин объектар эцигнава. Кьилди къачуртIа, КIварчагъа кардик квай, футболдин фестиваль кьиле фейи 2019-йисуз эцигай спорткомплексни меценат, Дагъустандин Халкьдин Собранидин депутат Имам Яралиеван мергьяматлувилин «Умуд» фондунин такьатрихъ эцигна ва муниципалитетдив вахкана. Меценат Марат Шайдаева Цмурдал вичин харжийрихъ алай аямдин школа эцигна ва райондиз багъишна. Ихьтин проектар алай вахтундани кьилиз акъудзава.
Шад мярекатдал жаван футболистрин тIварцIихъ чими келимаяр республикадин вице-премьер Нариман Абдулмуталибова, РД-дин Халкьдин Собранидин Председателдин заместитель Камил Давдиева ва масабуру лагьана.
Футболдин турнирда Кьиблепатан Дагъустандин районрай тир 8 командади иштиракна. Къугъунар Вини ва Кьулан СтIалрин спортдин майданрал кьиле тухвана. КIварчагъа, футболдин фестивалдин сергьятра аваз, кьиле тухвай финалдин къугъунра СтIал Сулейманан, Мегьарамдхуьруьн ва Ахцегь районрин жаван футболистрин командайри чпин устадвал къалурна. СтIал Сулейманан райондай кьве командади иштиракна. Финалда абурукай тир кьилин командадиз Мегьарамдхуьруьн райондин команда 3:0 гьисабдалди кумукьна. СтIал Сулейманан райондин кьвед лагьай команда буьруьнждин медалдиз лайихлу хьана.
Фестивалда гъалибвал къазанмишай командайриз кубокар, медалар, талукь дережайрин дипломар ва пулдин пишкешар гана. Спортдин серенжемдин вири иштиракчияр рикIел аламукьдай пишкешар гуналди къейдна.
Рагнеда Рамалданова
